Трамп Украинани кескин огоҳлантирди

АҚШ Президенти Дональд Трамп Украина тинчлик келишувига эришишни истамаса, мамлакатни жуда ёмон оқибатлар кутиб турганини айтди. Бу ҳақда у кеча, 20 октябрь куни Оқ уйда журналистлар билан суҳбатда сўз очди.

Трампнинг билдиришича, Украина ўзи тинчлик келишувини тузишни исташи керак. Унинг айтишича, АҚШ ва Европа Украинага катта миқдорда маблағ сарфлаган, бироқ Европа бундан чарчаган.

“Агар Зеленский келишув тузишни истамаса, уни жуда ёмон оқибатлар кутмоқда“, деган Трамп.

Шунингдек, у Россияни “тўхтовсиз олдинга ҳаракатланаётган катта машина“га қиёслаган.

“Агар у менга қулоқ солганида, анча олдин яхшироқ шартларда келишувга эришиши мумкин эди“, деган АҚШ Президенти.

Унинг фикрича, Украинага бошқа раҳбар муносиброқ бўлиши мумкин.

Кремль матбуот котиби Дмитрий Песков ҳам Зеленский тинчлик келишуви учун масъулиятни ўз зиммасига олишни истамаётгани ҳақидаги Трамп фикрига қўшилган. Бироқ у Украинадаги амалдаги раҳбарият иштирокисиз бирор масалани муҳокама қилиш имконсизлигини айтган.

Песковнинг таъкидлашича, Москва тинчликка эришишни истайди ва бунинг учун тинч йўлларни изламоқда. Аммо бунга эришишнинг иложи бўлмаса, Россия урушни давом эттириб, бор кучини ишга солади.

Эслатиб ўтамиз, аввалроқ АҚШ Президенти Дональд Трамп Вашингтон Украина Президенти Владимир Зеленский билан муносабатда бўлмагани маъқуллигини айтганди.