Трамп Украинага қурол таъминотини тиклашни буюрди – CNN

Жорий йилнинг 8 июль куни АҚШ ҳукумати йиғилишида Президент Дональд Трамп Украинага қурол етказиб бериш тўхтатилишини маъқулламаган ва уларни қайта тиклашни буюрган. Бу ҳақда ўз манбаларига таяниб, CNN хабар берди.  

Вазиятдан хабардор манбаларга кўра, Мудофаа вазири Пит Ҳегсет ўтган ҳафтада Украинага қурол етказиб беришни тўхтатиш тўғрисида қарор қабул қилганида бу ҳақда Оқ уйни олдиндан хабардор қилмаган.

Президент Дональд Трамп бу қадам учун ўзини масъул эмаслигини айтган. Ҳукумат йиғилишида ундан “қурол етказиб беришни тўхтатишни маъқуллаяпсизми?”, деб сўралганда, Трамп бу саволга рад жавобини берган ва АҚШ Украинага мудофаа қуролларини етказишда давом этишини айтган. Шундан сўнг, у Ҳегсетга ўқ-дорилар, хусусан, Patriot ҳаво мудофааси тизимлари учун тутиб қолувчи ракеталарни етказиб беришни тиклашни буюрган. Бу ракеталар Украина учун ракета ва дрон ҳужумларидан ҳимояланишда ҳал қилувчи аҳамиятга эга.

Маъмуриятдаги юқори мартабали расмийнинг журналистларга айтишича, ўқ-дориларнинг кўпчилиги аллақачон Польшада бўлиб, уларни тез орада Киевга етказиш мумкин. Қурол-яроғ тўплами олдинги маъмурият томонидан ажратилган бўлиб, у аллақачон Украинага жўнатилаётган бўлган, бироқ кейинчалик тўхтатилган.

Эслатиб ўтамиз, 2 июль куни Оқ уй Пентагон Украинага ракеталар ва ўқ-дорилар партиясини юборишни тўхтатганини тасдиқлаганди. Бунга АҚШ Қуролли кучларидаги захиралар борасидаги хавотир сабаб бўлгани айтилган эди. ОАВнинг хабар беришича, бу қарор Пентагон раҳбари Америка Қуролли кучларидаги ўқ-дори захираларини текширишни талаб қилганидан сўнг қабул қилинган. Айтилишича, Украина уруши ва Яқин Шарқдаги можаро туфайли АҚШ армияси захиралари анча камайиб кетган.

Кейинчалик АҚШ Давлат департаменти қурол етказиб бериш тўхтатилмаганини, балки вақтинча пауза олинганини маълум қилди.