Трамп Tesla’дан қутулмоқчи

АҚШ Президенти Дональд Трамп илгари сотиб олган Tesla автомобилини сотиш ёки совға қилишни ўйламоқда. Бу ҳақда Оқ уйдаги манбасига таяниб, “New York Post” хабар берди.

У бу машинани Tesla  бош директори Илон Маскни қўллаб-қувватлаш мақсадида харид қилган эди. Бироқ яқинда улар ўртасида очиқ можарога сабаб бўлган зиддият юзага келди.

Манбанинг аниқлик киритишича, гап Tesla Model S русумидаги қизил рангли автомобиль ҳақида кетмоқда. Унинг қиймати тахминан 80-100 минг АҚШ долларини ташкил этади. Трамп бу автомобилни март ойининг бошида харид қилган. Ўша пайтда Маскнинг компанияси унинг баҳсли чиқишлари туфайли танқид остида қолган ва Tesla Takedown деб номланган ҳаракат ташкил топиб, одамларни компания маҳсулотларини бойкот қилишга чақирган эди.

Шундан буён автомобиль Оқ уй олдидаги автотураргоҳда турган.

Трамп ва Маск ўртасида зиддият

Жорий йилнинг май ойи охирида Илон Маск Давлат самарадорлиги департаменти раҳбарлигидан истеъфога чиққач, Трампнинг “Катта солиқ имтиёзлари тўғрисида”ги қонунини кескин танқид қилди. Шунингдек, у Жаред Айзекманни NASA раҳбари этиб тайинламаслик қароридан норози бўлди. Айзекман – Маск билан бир нечта лойиҳаларда ҳамкорлик қилган тадбиркор ва астронавт.

Мазкур қарорлар Трамп ва Маск ўртасида кескин можарога сабаб бўлди. Можаро давомида улар бир-бирини очиқчасига ҳақорат қилди, ҳаттоки Маск Трампга импичмент эълон қилинишини очиқ қўллаб-қувватлади.

Эслатиб ўтамиз, аввалроқ америкалик миллиардер Илон Маск АҚШ Президенти Дональд Трамп “Эпштейн файллари”да борлигини айтганди. Эпштейн файллари молиячи Жеффри Эпштейннинг ҳужжатларидир. У биринчи марта 2006 йилда айбланган, фоҳишаликни ташкил қилишда айбини тан олган ва вояга етмаган қизни зўрлаганликда айбланган. Миллиардер 2019 йилнинг ёзида АҚШда яна қўлга олинди. У қизлар, жумладан, 14 ёшли болалар савдоси ва уларни фоҳишаликка ундашда айбланган эди.