Трамп талабалар ва журналистлар учун виза беришни қийинлаштирмоқчи

АҚШ Президенти Дональд Трамп маъмурияти хорижлик талабалар, маданий алмашинув дастури иштирокчилари ва журналистлар учун виза қоидаларини қатъийлаштиришга қарор қилди. Бу ҳақда “Reuters” хабар берди.

Қайд этилишича, АҚШ Ички хавфсизлик департаменти қабул қилган янги қоидага кўра, F тоифасидаги талабалар визаси ва J тоифасидаги маданий алмашинув визасининг амал қилиш муддати кўпи билан тўрт йил этиб белгиланади. Илгари ушбу визалар ўқиш ёки дастур давомийлигига қараб амал қилар эди.

Шунингдек, хорижий ОАВ вакиллари учун бериладиган I тоифадаги визанинг амал қилиш муддати 240 кун билан чекланади. Хитой фуқароси бўлган журналистлар учун эса бу муддат 90 кунни ташкил этади.

Янги тартиб расмий реестрда эълон қилинганидан сўнг 60 кун ичида кучга киради. Бироқ у Конгресс томонидан кўриб чиқилиши ҳам мумкин.

Маълум қилинишича, янги қоидалар талабалар учун ҳам қўшимча чекловларни назарда тутади. Хусусан, магистратура талабаларига тегишли рухсатсиз ўқиш йўналишини ўзгартириш ёки бошқа олий таълим муассасасига кўчиш тақиқланади. Шунингдек, ўқиш ёки амалиёт якунланганидан кейин АҚШни тарк этиш учун берилган муҳлат 60 кундан 30 кунга қисқартирилади.

Шу билан бирга, виза эгалари белгиланган муддат тугагач мамлакатда қолишни истаса, муддатни узайтириш учун алоҳида мурожаат қилиши ёки АҚШдан чиқиб, қайтадан кириш орқали янги рухсат олиши керак бўлади.

2024 йилда мамлакатга 1,8 миллиондан ортиқ талабалар визаси билан кириш қайд этилган бўлиб, бу ўтган йилга нисбатан 11 фоизга кўп. Шунингдек, 500 мингдан зиёд маданий алмашинув иштирокчилари ва 37,3 минг нафар хорижий журналист АҚШ визасини олган. Департамент бундай ташриф буюрувчилар сонининг кескин ортиши уларнинг мамлакатда бўлишини назорат қилишни қийинлаштираётганини билдирган.

Янги тартиб Хитойнинг норозилигига ҳам сабаб бўлди. Хитой Ташқи ишлар вазирлиги АҚШнинг мазкур қарорини “камситувчи” деб атаб, уни зудлик билан бекор қилишга чақирган ҳамда жавоб чораларини кўриш ҳуқуқини сақлаб қолишини маълум қилган.

Эслатиб ўтамиз, жорий йилнинг 24 июнь куни АҚШ Олий суди федерал чегара хизмати ходимларига грин-картага эга бўлган айрим шахсларни ҳам депортация қилиш имконини берувчи қарор қабул қилган эди.