Трамп Россияга қарши янги санкцияларни қўллаб-қувватлади – Грэм

АҚШ Президенти Дональд Трамп Украинадаги урушга қарамай, Россия билан савдо қилувчи давлатларга нисбатан 500 фоизлик божлар тўғрисидаги қонун лойиҳасини қўллаб-қувватлади. Бу ҳақда бугун, 30 июнь куни қонун лойиҳаси ҳаммуаллифи, республикачи сенатор Линдси Грэм Американинг ABC телеканалига берган интервьюсида айтиб ўтди.

“Кеча, биринчи марта, биз гольф ўйнаётганимизда, Президент менга қонун лойиҳасини олдинга силжитиш вақти келганини айтди”, деди Грэм.

Унинг сўзларига кўра, ҳужжатни кўриб чиқиш “июлдаги танаффусдан сўнг”, яъни АҚШ Мустақиллик куни нишонлангандан кейин бошланади. Конгресс ишини 7 июлда давом эттириши режалаштирилган.

“Агар сиз Россиядан маҳсулот сотиб олсангиз ва Украинага ёрдам бермасангиз, АҚШга кетадиган товарларингизга 500% тарифлар бўлади. Ҳиндистон ва Хитой Путиннинг нефтининг 70 фоизини сотиб олади ва шу орқали унинг уруш машинасини ишлайди. Қонун лойиҳасини 84 сенатор қўлламоқда. Бу Президентга Ҳиндистон, Хитой ва бошқа мамлакатларга қарши санкциялар қўйиш имконини беради”, деди Грэм.

Унинг фикрича, қонун лойиҳасини қабул қилиш Трампга “ҳозирда унда йўқ восита” беради. Сенатор Президент қонун лойиҳасини имзолайдими ёки йўқми деган тўғридан-тўғри саволга жавоб беришдан қочди ва “у яхши ҳолатда” деб жавоб берди.

1 апрель куни Грэм ва демократ Ричард Блументал бошчилигидаги ҳар икки партиядан 50 нафар америкалик сенаторлар гуруҳи Россия Украинада ўт очишни тўхтатишга розилик беришдан бош тортса, унга қарши янги санкциялар тўғрисидаги қонун лойиҳасини тақдим этди.

Ҳужжатда Россиядан нефть, газ, уран ва бошқа маҳсулотларни сотиб олувчи давлатлардан АҚШга импорт қилинадиган товарларга 500% бож тўлаш таклиф этилади. Қонун лойиҳаси муаллифлари янги санкциялар АҚШ Конгрессининг юқори ва қуйи палаталарида кўпчилик томонидан қўллаб-қувватланганига ишонтиришди.

19 май куни Владимир Путин билан суҳбатдан сўнг Трамп Украинада ҳалигача ўт очишни тўхтатишга эришилмаган бўлса-да, Россияга қарши янги санкциялар қўллашдан бош тортди. 

Шу билан бирга, апрель ойи бошида Трампнинг ўзи ҳам АҚШ савдо ҳамкорларига нисбатан 50 фоизгача божхона тўловларини жорий этишга уриниб кўрган эди. Уларнинг кўпчилиги жавоб чораларини кўрди.

Кейинчалик республикачи чекловларнинг кўп қисмини музлатиб қўйди ва ушбу мамлакатлар расмийлари билан савдо музокараларига киришди.

Грэм ва Блументал аввалроқ Россияга оид қўшма қонун лойиҳаларини илгари сурган эди. 2022 йил сентябрь ва 2024 йил июнь ойларида улар Россия Федерациясини терроризмнинг ҳомийси сифатида тан олишни таклиф қилишди. 2025 йил март ойида улар Россиянинг музлатилган 300 миллиард доллардан ортиқ активларини мусодара қилиш ва уларни Украинага топширишни талаб қилишди. Бу ташаббусларнинг барчаси давом эттирилмади.