Трамп Роналдуга қўнғироқ қилди

АҚШ Президенти Дональд Трамп кеча, 6 декабрь куни Португалия терма жамоаси ва Саудия Арабистонининг “Ал-Наср” клубида ўйнаётган таниқли футболчи Криштиану Роналду билан телефон орқали мулоқот қилганини эълон қилди.

Truth Social платформасидаги постида америкалик етакчи португалиялик футболчи у билан телефон орқали боғланиб, Оқ уй ва Овал кабинетга шу ҳафтада қилган сафари учун миннатдорлик билдирганини таъкидлади.

“У нафақат спортчи, балки шахс сифатида ақл бовар қилмайдиган инсон”, деб таъкидлади Трамп.

Ноябрь ойида Роналду ва унинг бўлажак турмуш ўртоғи Жоржина Родригес Вашингтондаги зиёфатга таклиф қилинган эди. Кечки овқатда асосий меҳмон Саудия Арабистони валиаҳд шаҳзодаси ва Бош вазири Муҳаммад бин Салмон, қабул қилувчи томон – Трамп ва унинг рафиқаси Мелания Трамп билан бирга АҚШ Давлат котиби Марко Рубио, Молия вазири Скотт Бессант ва Мудофаа вазири Пит Ҳегсет ҳам иштирок этган. Шунингдек, FIFA президенти Жанни Инфантино, Amazon асосчиси Жефф Безос ва америкалик тадбиркор ва миллиардер Илон Маск ҳам меҳмонлар орасида бўлган.

Ташриф давомида Америка Президентининг шахсан ўзи уларни Оқ уй бўйлаб айлантирди. Трамп, шунингдек, бундай машҳур спортчи билан учрашиш унинг ўғли Баррон билан муносабатларига ижобий таъсир қилганини таъкидлади.

Шунингдек, Трамп ўзининг офисида Роналду билан футбол ўйнаётгани акс этган сунъий интеллект ёрдамида яратилган видеони ҳам эълон қилди.

Эслатиб ўтамиз, аввалроқ футбол бўйича Португалия терма жамоаси сардори Криштиану Роналду аралаш яккакурашлар бўйича WOW FC (The Way of Warriors FC) компаниясининг ҳаммуаллифига айланди.