Tramp Putinni 2 soat davomida nimalarga ko‘ndirdi?

Bugun, 18 mart kuni Rossiya Prezidenti Vladimir Putin va AQSH Prezidenti Donald Tramp o‘rtasida telefon orqali muloqot bo‘lib o‘tdi. Muloqotda Donald Tramp tomonlar o‘rtasida 30 kun davomida energetika infratuzilmasiga zarba berishdan voz kechish taklifini ilgari surgan. Vladimir Putin bu tashabbusga ijobiy munosabat bildirgan va Rossiya harbiylariga tegishli ko‘rsatmalar bergan. Bu haqda Kreml matbuot xizmati xabar berdi.

Qayd etilishicha, liderlar Ukraina atrofidagi vaziyat yuzasidan batafsil va ochiq fikr almashuvni davom ettirgan. Vladimir Putin jangovar harakatlarni va insoniy talafotlarni to‘xtatish yo‘lidagi sa’y-harakatlari uchun Donald Trampga minnatdorlik bildirgan.

“Rossiya Prezidenti mojaroni tinch yo‘l bilan hal etishga prinsipial sodiqligini tasdiqlab, Amerika hamkorlari bilan birgalikda muammoni puxta va har tomonlama hal qilish yo‘llarini izlashga tayyor ekanini ta’kidladi. U bu jarayon kompleks, barqaror va uzoq muddatli bo‘lishi kerakligini qayd etib, inqirozning asosiy sabablarini bartaraf etish hamda Rossiyaning xavfsizlik sohasidagi qonuniy manfaatlarini hisobga olish zarurligini alohida ta’kidladi”, deyiladi xabarda.

Shuningdek, AQSH Prezidentining 30 kunlik o‘t ochishni to‘xtatish tashabbusi doirasida Rossiya tomoni muhim jihatlarni ilgari surgan. Xususan, jangovar harakatlar chizig‘ida o‘t ochishni haqiqatan ham nazorat qilish, Ukrainada majburiy safarbarlik va harbiy kuchlarni qayta qurollantirishni to‘xtatish kabi masalalar ko‘tarilgan.

“Kiyev rejimining oldingi kelishuvlarni buzgan holatlari hamda Ukraina harbiylari tomonidan Kursk viloyatida sodir etilgan terroristik hujumlar xavfli oqibatlarga olib kelishi mumkinligi ta’kidlandi” deya xabar berdi Kreml matbuot xizmati.

Qayd etilishicha, muzokaralar chog‘ida mojaroni siyosiy-diplomatik yo‘l bilan hal qilish va uning keskinlashuviga yo‘l qo‘ymaslik uchun eng muhim shart – Ukrainaga harbiy yordam va razvedka ma’lumotlarini berishni butunlay to‘xtatish ekani alohida qayd etilgan.

Donald Trampning Kursk viloyatida qurshovda qolgan ukrainalik harbiylarning hayotini saqlab qolish haqidagi iltimosiga javoban, Vladimir Putin Rossiya ularni insonparvarlik nuqtai nazaridan asirlikka olishi va harbiy asirlarga nisbatan xalqaro huquq normalari doirasida munosabatda bo‘lishini tasdiqlagan.

Muloqot davomida Donald Tramp tomonlar o‘rtasida 30 kun davomida energetika infratuzilmasiga zarba berishdan voz kechish taklifini ilgari surgan. Vladimir Putin bu tashabbusga ijobiy munosabat bildirgan va Rossiya harbiylariga tegishli ko‘rsatmalar bergan.

Shuningdek, Rossiya Prezidenti Donald Tramp ilgari surgan Qora dengiz akvatoriyasida kemalar xavfsizligini ta’minlash bo‘yicha mashhur tashabbusni amalga oshirish taklifiga ham konstruktiv yondashgan. Bu borada muzokaralar o‘tkazilib, tafsilotlarni qo‘shimcha ishlab chiqish bo‘yicha kelishuvga erishilgan.

Vladimir Putin 19 mart kuni Rossiya va Ukraina tomonlari o‘rtasida 175 ga 175 shaklida harbiy asirlarni almashish rejalashtirilganini ma’lum qilgan. Bundan tashqari, Rossiya gospitalida davolanayotgan 23 nafar og‘ir yarador ukrainalik harbiylar insonparvarlik harakati sifatida Ukrainaga topshiriladi.

Liderlar Ukraina bo‘yicha kelishuvlarni davom ettirish niyatida ekanliklarini tasdiqlab, AQSH Prezidenti ilgari surgan takliflarni hisobga olgan holda, Rossiya va AQSH ekspertlar guruhi tuzilishini e’lon qilgan.

Vladimir Putin va Donald Tramp Yaqin Sharq hamda Qizil dengiz mintaqasidagi vaziyatni ham muhokama qilib, global xavfsizlik va yadro qurollarining tarqalishini oldini olish borasida hamkorlik qilishga kelishib olgan. Ular bu kabi o‘zaro hamkorlik Rossiya-AQSH munosabatlari umumiy muhitini yaxshilashga xizmat qilishini qayd etgan. Shu nuqtai nazardan, BMTda Ukraina mojarosi bo‘yicha rezolyutsiyaga Rossiya va AQSHning birgalikda ovoz berishi ijobiy misol sifatida tilga olingan.

Tomonlar Rossiya va AQSH o‘rtasidagi aloqalarni normallashtirishga qaratilgan o‘zaro manfaatli hamkorlikni rivojlantirish masalalarini muhokama qilgan. Shu jumladan, iqtisodiy va energetika sohasidagi hamkorlik istiqbollari ham ko‘rib chiqilgan.

Donald Tramp Vladimir Putinning Rossiya va AQSHda KHL va NHL o‘yinchilari ishtirokida xokkey musobaqalarini tashkil etish haqidagi taklifini qo‘llab-quvvatlagan. Prezidentlar muayyan masalalar bo‘yicha o‘zaro aloqalarni davom ettirishga kelishib olgan.

Eslatib o‘tamiz, avvalroq Vladimir Putin va Donald Trampning telefon orqali muloqoti Moskva vaqti bilan taxminan soat 17:00 da boshlangani va ikki yarim soat davom etgani xabar qilingandi. Muloqot davom etayotgan paytda Oq uy apparati rahbarining o‘rinbosari Den Skavino uni “yaxshi o‘tmoqda” deb ta’kidlagan.