Трамп Путинга ҳам таклиф юборгани тасдиқланди

АҚШ Президенти Дональд Трамп россиялик мавқедоши Владимир Путинга Ғазо секторидаги вазиятни ҳал қилиш учун “Тинчлик кенгаши”га қўшилиш таклифини юборганини тасдиқлади. Бу ҳақда “Reuters” хабар берди. 

“У таклиф қилинди”, дея журналистлар билан суҳбатда тегишли масалага тўхталиб ўтган Америка етакчиси. 

Путин Трампнинг "Тинчлик кенгаши"га кириш таклифини дипломатик каналлар орқали олгани ҳақида кеча, 19 январь куни Россия Президенти матбуот котиби Дмитрий Песков маълум қилганди. 

“Айни пайтда биз ушбу таклифнинг барча тафсилотларини ўрганмоқдамиз, барча нозик жиҳатларни аниқлаштириш учун Америка томони билан алоқаларга умид қиламиз”, дея тушунтирганди Песков. 

“The Financial Times” нашрининг ёзишича, Трампнинг Путинни таклиф қилишига у билан мулоқот ва илиқ муносабатларни сақлаб қолиш истаги сабаб бўлган. 

Марказий Осиё давлатларидан эса Қозоғистон Президенти Қосим-Жомарт Тўқаев ва Ўзбекистон Республикаси Президенти Шавкат Мирзиёев ҳам худди шундай таклифни қабул қилди.

Эслатиб ўтамиз, АҚШ Президенти Дональд Трамп жорий йил 16 январда Ғазо секторида Тинчлик кенгаши тузилишини эълон қилган эди. Ушбу тузилмани ташкил этиш Трампнинг Ғазо бўйича тинчлик режасининг бир қисми бўлиб, унда халқаро кучларни жойлаштириш ҳам назарда тутилган. Бирлашманинг ижроия қўмитаси таркибига АҚШ Давлат котиби Марко Рубио, Трампнинг махсус вакили Стив Уиткофф, Президентнинг куёви Жаред Кушнер ҳамда Буюк Британиянинг собиқ бош вазири Тони Блэр киради.

“Bloomberg” маълумотларига кўра, АҚШ Ғазо сектори бўйича халқаро Тинчлик кенгашида доимий ўрин олишни истаган давлатлардан камида 1 миллиард АҚШ доллари бадал киритишни сўрамоқда. Ижроия кенгашининг биринчи раиси Трампнинг ўзи бўлиб, ташкилот аъзолигига кимни қабул қилиш масаласини айнан у ҳал қилади. Тинчлик кенгашига аъзо бўлган ҳар бир давлат уч йилдан ортиқ бўлмаган муддатга тайинланади ва битта овозга эга бўлади. Кенгаш қарорлари кўпчилик овоз билан қабул қилинади, бироқ уларнинг барчаси раис – Трамп томонидан тасдиқланиши шарт.