Трамп Обамани маймунга қиёслади (видео)

АҚШ Президенти Дональд Трамп Truth Social ижтимоий тармоғида собиқ президент Барак Обама ва унинг рафиқаси Мишель Обамани маймун қиёфасида тасвирланган видеороликни эълон қилди.

Обамалар акс этган лавҳа қисқа видеонинг охирида пайдо бўлади. Ушбу видеода 2020 йилги президентлик сайловларида овозларни ҳисоблаш машиналари қалбакилаштиришга ёрдам бергани ҳақида даъво қилинади (ўша сайловда Жо Байден ғалаба қозонган). Сайловлар ҳақидаги видео бир неча сонияга юқорига сурилиб кетади ва шундан сўнг Барак ва Мишель Обамалар тасвири пайдо бўлади, кейин эса сайловларга оид видео яна давом этади. Собиқ президент ва биринчи хонимнинг юзлари пайдо бўлган пайтда “Қирол шер” мультфилмида янграган қўшиқ янграйди.

Оқ уй мазкур видео юзасидан билдирилган ирқчилик ҳақидаги айбловларни рад этган. CNN телеканалига Оқ уй матбуот котиби Керолайн Левиттнинг айтишича, бу “интернет-мемдан олинган парча бўлиб, унда президент Трамп жунгли подшоси қиёфасида, демократлар эса “Қирол шер” мультфилми қаҳрамонлари образида тасвирланган”. У билдирилган эътирозларни “сохта” деб атади.

CNN’га маълум қилишларича, расмий шахслар орасидаги манбалардан бири ушбу видеоролик маъмурият ходимларидан бири томонидан тасодифан жойлаштирилгани, ёзув эса аллақачон ўчириб ташланганини айтган.
Телеканалнинг яна бир манбаси бир нечта республикачи конгрессменлар Трамп билан боғланиб, ушбу постни муҳокама қилганини маълум қилган.

Ўтган ҳафта Трамп Барак Обамани ҳибсга олишга чақириб, уни Россия билан ҳамкорлик бўйича айбловларни уйдиришда айблаган эди. Трампнинг сўзларига кўра, АҚШ Миллий разведкаси раҳбари Тулси Габбард “юзлаб шов-шувли ҳужжатлар”ни эълон қилган бўлиб, улар собиқ Америка етакчиси шахсан Марказий разведка бошқармасига ёлғон айбловлар тўқиб чиқариш ҳақида буйруқ берганини исботлайди. Оқ уй раҳбари буни Обама ва “унинг тарафдорлари” томонидан амалга оширилган “давлат тўнтаришига уриниш” деб атаган.

Эслатиб ўтамиз, аввалроқ Барак Обаманинг Вашингтондаги уйи яқинида АҚШ Махфий хизматининг икки нафар аёл агенти жанжаллашганди. Воқеа акс этган видео ижтимоий тармоқларда тарқалганидан сўнг ходимлар вақтинча ишдан четлатилган.