Трамп “мудҳиш” Хитой сабабли Россия ва Ҳиндистонни йўқотганини айтди

АҚШ Президенти Дональд Трамп Хитой сабабли Россия ва Ҳиндистонни йўқотганини айтди. Бу ҳақда у кеча, 5 сентябрь куни ўзининг Truth Social’даги саҳифасида ёзди.

“Биз энг мудҳиш ва тубсиз Хитой сабабли Ҳиндистон ва Россияни йўқотганга ўхшаймиз. Уларга биргаликда узоқ ва фаровон келажак тилайман!”, деб ёзган Трамп ва ўз постига Россия Президенти Владимир Путин, ХХР Раиси Си Цзиньпин ва Ҳиндистон Бош вазири Нарендра Модининг суратини илова қилган.

Маълумот учун, шу ҳафтада Хитой, Россия ва Ҳиндистон раҳбарлари Хитойнинг Тяньцзинь шаҳрида бўлиб ўтган Шанхай ҳамкорлик ташкилоти (ШҲТ) саммитида қатнашганди. “Bloomberg” уларнинг биргаликда кўринишини: "АҚШ бошчилигидаги жаҳон тартибига муқобил тартибни яратиш бўйича Хитой сиёсий лойиҳасининг ғалабасини намоён этди”, деб ёзди.

Трампнинг ўзи эса Хитой ва Россиянинг АҚШга қарши бирлашиш хавфи уни мутлақо ташвишга солмаслигини билдирди.

“Улар ҳеч қачон қуролли кучларини бизга қарши ишлатмайди. Ишонинг, бу улар қилиши мумкин бўлган энг ёмон нарса бўлади”, деган у.

Саммит якунида Пекинда Иккинчи жаҳон уруши тугаганининг 80 йиллиги муносабати билан ҳарбий парад бўлиб ўтди. Унда Россия Президенти, шунингдек, КХДР етакчиси Ким Чен Ин ҳам қатнашди. Трамп тадбирни кузатганини айтди. Кейинроқ эса Truth Social’да Си Цзиньпиндан Путинга ва Ким Чен Инга “АҚШга қарши фитна қураётганингизда энг самимий тилакларимни етказинг” дея сўраб, пост жойлади.

Бунга жавобан Кремль АҚШ Президентининг “фитна” ҳақидаги сўзларини киноя, ёки кўчма маънода айтилган бўлиши мумкин деб ҳисоблашини маълум қилди. Хусусан, Россия Президентининг матбуот котиби Дмитрий Песков “ҳеч қандай фитна ҳеч ким томонидан режалаштирилмаганини” айтди.

Эслатиб ўтамиз, Хитой ҳам Ҳиндистон ҳам бир неча ойдан буён АҚШ билан савдо келишувининг шартларини муҳокама қилмоқда. Дастлаб, ХХР билан қарама-қаршилик фонида Хитой маҳсулотларига АҚШ божхона божлари 145 фоизга оширилган эди, кейинчалик эса томонлар тарифларни вақтинчалик пасайтиришга келишиб олди. Ҳиндистон учун АҚШ божхона тарифларининг умумий ҳажми ҳозирда 50 фоизни ташкил қилади. “The Washington Post”нинг ёзишича, Трамп Нью-Деҳли Россия нефтини харид қилишни камайтиришга рози бўлмагунича Ҳиндистон билан савдо келишуви ҳақида гаплашишдан бош тортган.