Трамп Киевни ҳужумга ўтишга чақирди – WP

АҚШ Президенти Дональд Трамп 4 июль куни Украина Президенти Владимир Зеленский билан суҳбатда Украина мудофаа ҳолатида уруш йўналишини ўзгартирмаслигини ва ҳужумга ўтиши кераклигини айтди. Бу ҳақда бугун, 18 июль куни украиналик мулозимга таяниб, “The Washington Post” газетаси хабар берди.

Қайд этилишича, Трампнинг Украина Москвани ёки Санкт-Петербургни бомбардимон қила оладими, деган саволига Зеленский “Агар бизда тўғри қурол бўлса, биз қила оламиз”, деб жавоб берган.

Президентлар суҳбатининг бу қисми аввалроқ “The Financial Times” томонидан келтирилганди. Оқ уй матбуот котиби Кэролайн Ливиттнинг аниқлик киритишича, Трамп Зеленскийдан фақат назарий имконият ҳақида сўраяпти, лекин бундай зарба беришга чақирмаган.

WP манбасининг айтишича, Украина Президенти девони раҳбари Андрей Ермак икки президентнинг 4 июль куни бўлиб ўтган суҳбатини “у билан бутун ҳаётимиздаги энг яхши суҳбат” деб атаган, Зеленский ҳам бу фикрга қўшилган. Унинг сўзларига кўра, бундай ижобий муносабат Зеленский жамоасини ҳайратда қолдирди.

Июль ойида Трамп “Путиндан ҳафсаласи пир бўлганини” тан олди ва у билан бир неча ой олдин келишувга эришишга умид қилганини айтди. 14 июль куни у агар яқин 50 кун ичида Украинада тинчлик ўрнатиш бўйича келишувга эришилмаса, АҚШ Россиянинг савдо ҳамкорларига 100 фоизлик иккиламчи божлар жорий этишини эълон қилди.

Бундан ташқари, Трамп Европа давлатлари билан биргаликда Украинага ҳаво ҳужумидан мудофаа тизимлари, жумладан Patriot қурилмалари ҳамда кўп сонли қурол-яроғ ва бошқа ҳарбий техника етказиб беришга ваъда берди.

Россия Президенти матбуот котиби Дмитрий Песков Трампнинг баёнотларини шарҳлар экан, улар “жуда жиддий” эканини айтди. Песковнинг сўзларига кўра, Россия Президенти америкалик мавқедошининг баёнотларига “агар зарур деб ҳисобласа” изоҳ беради.