Трамп Исроилни мундиалдан четлатишга қарши чиқмоқчи

АҚШ Президенти Дональд Трамп маъмурияти Исроилни футбол бўйича Жаҳон чемпионатидан четлаштиришга қарши чиқмоқчи. Бу ҳақда “Sky News” хабар берди.

Телеканалга кўра, Трамп маъмурияти FIFA’нинг Исроилни халқаро футбол мусобақаларидан четлатишига йўл қўймаслик устида ишлайди. Хусусан, улар Исроил терма жамоасининг 2026 йилги мундиалда қатнашишини кафолатлашга ҳаракат қилади.

Бунгача БМТ экспертлари Ғазо билан боғлиқ вазият туфайли бутун дунё ва Европадаги футбол органларига Исроил жамоаларининг иштирокини тўхтатишни тавсия қилган эди. FIFA эса махсус маърузачиларга жавоб бермаган. Шунга қарамай, Исроил футболчилари Жаҳон чемпионатида қатнашиш ҳуқуқи учун курашни давом эттирмоқда. 

“Биз Исроил миллий терма жамоасининг Жаҳон чемпионатида иштирокини тақиқлаш бўйича ҳар қандай уринишларга қатъий қарши чиқамиз”, дейди АҚШ Давлат департаменти вакили “Sky News” билан суҳбатда.

Манбаларга кўра, АҚШ ҳукумати спорт санкцияларининг жорий этилишига йўл қўймаслик учун ушбу масалага аллақачон аралашган.

Олдинроқ, UEFA Исроилни халқаро мусобақалардан четлатиш масаласини ҳам кўриб чиққан, бироқ якунда қарор исроилликлар фойдасига чиқарилган. “Israel Hayom” нашрига кўра, бу қарорга АҚШнинг босими таъсир кўрсатган.

Эслатиб ўтамиз, аввалроқ Испания Бош вазири Педро Санчес ҳам Ғазода давом этаётган можаро сабабли Исроилни халқаро спорт мусобақаларидан четлатишга чақирган эди. Шунингдек, Испания Конгресси аъзоси Патхи Лопес агар Исроил терма жамоаси саралашдан ўтса, Испания 2026 йилги Жаҳон чемпионатида қатнашмаслиги мумкинлигини айтганди.