Трамп Эрон билан келишув яқинлиги ҳақида 37 мартадан ортиқ баёнот берган – ОАВ

АҚШ Президенти Дональд Трамп камида 37 марта Эрон билан тез орада келишув тузилиши мумкинлигини очиқ баёнот қилган. Бу ҳисоб-китобларни CNN телеканали эълон қилди.

Нашр маълумотига кўра, бу каби баёнотлар ижтимоий тармоқларда, оммавий чиқишларда ва ОАВга берган интервьюларида янграган. Уларда Трамп ёки келишув яқинлиги ҳақида гапирган, ёки Эрон келишувдан манфаатдор эканини билдирган.

Телеканал таъкидлашича, бундай баёнотлар илк бор 23 март куни янграган, энг сўнггиси эса 8 июн куни бўлган, унда президент келишув “икки ҳафта ичида” бўлиши мумкинлигини айтган.

CNN бу баёнотларга шубҳа билан қараб, уларнинг айримлари молиявий бозорларга таъсир қилиш ёки вазиятни ҳаддан ташқари оптимистик баҳолаш билан боғлиқ бўлиши мумкинлигини ҳам қайд этган.

Эслатиб ўтамиз, аввалроқ АҚШ Президенти Дональд Трамп Исроил Бош вазири Биньямин Нетаньяху билан сўнгги 24 соат ичида бўлиб ўтган телефон суҳбатида уни Эронга қарши ҳарбий ҳаракатларни кенгайтирмасликка чақирганди. Трампнинг айтишича, агар Исроил ҳужумлари кенг кўламли урушга айланиб кетса, Тель-Авив Эронга қарши курашда ёлғиз қолиши мумкин.