Трамп божхона тўловларини жорий этишни тўхтатди

АҚШ Президенти Дональд Трамп божхона тўловларини жорий этиш бўйича режасини вақтинча тўхтатди. Бу ҳақда “The Wall Street Journal” хабар берди.

Хабарга кўра, Трамп бу қарорга АҚШ Молия вазири Скотт Бессент ва Савдо вазири Говард Лютник билан ўтказилган музокаралардан сўнг келган. Улар Президентни кескин тариф сиёсатини вақтинча тўхтатишга кўндиришга ҳаракат қилган, бироқ Трампнинг савдо бўйича маслаҳатчиси Питер Наварро божларнинг сақлаб қолиниши тарафдори бўлган.

Шунингдек, Трампнинг яқин маслаҳатчиси Питер Наварро Президентнинг Бессент ва Лютник билан учрашганидан бехабар қолган.

Музокаралардан сўнг Трамп Truth Social ижтимоий тармоғидаги саҳифасида айрим божлар амалини тўхтатишга қарор қилганини маълум қилди.

Эслатиб ўтамиз, 2 апрелда Трамп томонидан жорий этилган янги божлар кучга киргач, АҚШ фонд бозорлари кескин қулаган ва бу ҳолат Оқ уйнинг жиддий хавотирига сабаб бўлган эди.

9 апрель куни Трамп тахминан 60 та давлатдан импорт қилинадиган маҳсулотларга нисбатан божларни 90 кунга кечиктиришини билдирган. Шунингдек, Хитойдан ташқари барча давлатларга 10 фоизлик “базавий” бож ва илгари жорий этилган 25 фоизлик автомобиль, пўлат ва алюминий учун тарифлар амал қилади.

Шу билан бирга, Трамп Хитойга нисбатан савдо урушини давом эттирмоқчи: Хитойдан импорт қилинадиган маҳсулотларга нисбатан бож 145 фоиз этиб белгиланган.