Трамп BBC’ни судга бермоқчи

АҚШ Президенти Дональд Трамп Британиянинг BBC компаниясини унга нисбатан “ёлғон, туҳмат, ҳақоратли ва ғазаб уйғотувчи баёнотлар” берганликда айблаб, 1 миллиард долларгача зарар ундириш учун судга бериш билан таҳдид қилмоқда. Бу ҳақда “Fox News” хабар берди.

Нашрга кўра, Трампнинг ҳуқуқшунослари BBC’dan уч нарсани талаб қилган: “Panorama” номли ҳужжатли фильмни эфирдан олиб ташлаш, расмий кечирим сўраш ва 1 миллиард доллар миқдорида товон тўлаш.

Трампнинг сўзларига кўра, BBC 2024 йил октябрь ойида эфирга узатган “Panorama” дастурида унинг 2021 йил 6 январда айтган нутқини таҳрир қилиб, гўё у тарафдорларини Конгрессни босиб олишга чақиргандек кўрсатган.

Аслида эса Трамп ўша нутқида фуқароларга тинч йўл билан ўз фикрини билдириш зарурлигини айтган эди. Фильмда эса нутқ парчалари кесилиб, Конгресс биносига юриб бораётган одамлар тасвирлари билан бирлаштирилган, бу эса томошабинда Трамп уларни ҳаракатга ундагандек таассурот қолдирган.

Мазкур можаро ортидан BBC бош директори Тим Дейви ва янгиликлар бўлими раҳбари Дебора Тернесс истеъфога чиққан. BBC раиси Самир Шоҳ эса бу таҳрир “хато қарор” бўлганини тан олган ва жамоатчиликдан узр сўраган.

Трампнинг адвокати 14 ноябргача BBC талабларни бажармаса, АҚШнинг Флорида штатида суд иши очилишини маълум қилган.

Маълумот учун, 2021 йилда Трамп тарафдорлари АҚШ Конгрессига бостириб кирган воқеа ортидан у “тартибсизликни қўзғатганликда” айбланиб, импичмент жараёнига тортилади. Бирoқ Сенат уни айбсиз деб топган.