Тошкентдаги яна 6 та метро бекати вақтинча ёпилади

Жорий йилнинг 28 июнь санасидан бошлаб “Қурувчилар (12-бекат) бекатидан Янгиобод (6-бекат)игача метро поездлар ҳаракати тўхтатилади. Бу ҳақда “Тошкент метрополитени” ДУК хабар берди.

Қайд этилишича, янги қурилган метро йўналишларида метро поездлар ҳаракати ва йўловчилар хавфсизлигини таъминлаш ҳамда сифатли хизмат кўрсатиш мақсадида ерусти эстакадалари ва бекатлари маълум муддат фойдалангандан сўнг режали профилактик ишларни амалга ошириш лозим.

Шу муносабат билан ерусти ҳалқа йўли йўналишининг “Технопарк – Қипчоқ” бекатлари оралиғида босқичма-босқич 3 ой муддатга мўлжалланган режали профилактик ишлари амалга оширилмоқда. Режали профилактик ишларни кейинги навбатини амалга ошириш учун жорий йил 28 июнь санасидан бошлаб, “Қурувчилар (12-бекат) – Янгиобод (6-бекат)” бекатлари оралиғида метро поездлар ҳаракати тўхтатилади.

“Қипчоқ-Янгиобод-Қипчоқ” метро бекатлари оралиғида бепул хизмат кўрсатувчи катта сиғимли автобуслар (метробус) ҳаракати йўлга қўйилади. Ушбу автобусларнинг кунлик иш вақти тонги 05:00 дан тунги 23:00 га қадар амалга оширилади.

Эслатиб ўтамиз, аввалроқ ушбу режали профилактик ишларни амалга ошириш учун “Турон (13-бекат) - Қипчоқ (14-бекат)” бекатлари оралиғида метро поездлар ҳаракати тўхтатилганди.