Тошкентда мижозининг юзига жароҳат етказган косметолог жазоланди

Тошкент шаҳри Чилонзор туманида косметолог бўлиб ишловчи аёл мижозининг юзига эҳтиётсизлик оқибатида тан жароҳати етказиб қўйгани учун жиноий жавобгарликка тортилди. QALAMPIR.UZ суд ҳужжати билан танишди.

Маълум бўлишича, судланувчи Чилонзор туманида жойлашган аёллар салонида косметолог лавозимида ишлаб келган. У тиббиёт соҳасида жарроҳлик амалиётини ўтказиш бўйича Соғлиқни сақлаш вазирлигидан тегишли рухсатнома олмасдан, қонун талабларига зид равишда, 2023 йилнинг 20 сентябрь куни соат 22:00 ларда ўз-ўзига ишониши ёки бепарволиги орқасида ушбу салонга мижоз сифатида келган аёлнинг юз соҳасини торайтириши учун унинг пешона соҳасидан қулоқ олди соҳасигача тиббий буюм (скальпель) ёрдамида кесиш йўли билан жарроҳлик амалиётини ўтказиб, мижозга эҳтиётсизлик орқасидан тан жароҳати етказган.

Қайд этилишича, судланувчи суд мажлисида ўз айбига тўлиқ иқрорлик билдирган.

Унинг сўзларига кўра, мижоз ўз юзини тортиб қўйишни сўраб мурожаат қилган. Аёл ушбу иш бўйича мутахассис эмаслиги ва рухсатномаси йўқлигини маълум қилган, лекин аёл рухсатномаси бўлмаса ҳам муолажа ўтказишини сўраган. Косметолог эса рози бўлган.

У операция ўтказган ва аёл 10 кун давомида тиббий муолажага қатнаши керак бўлган. Эртаси куни косметолог уни муолажа олишга чақирган, лекин у тўй сабаб қишлоққа жўнаб кетганини билдирган. Шундан кейин у косметологга ўзи ишлаб келаётган тиббий клиникада юз соҳасидаги ипларни олдириб ташлаганини, юзида оғриқлар йўқлигини, ҳаммаси жойида эканини айтган.

Орадан 5-6 ой муддат ўтгач, яъни 2024 йилнинг февраль ойларида мижоз юзида чандиқ излари қолганини айтиб, косметологга даъво қила бошлаган ва ундан 2 минг доллар сўраган. Косметолог зарарни қоплаб беришни хоҳламаган ва аёл ИИБга мурожаат қилган.

Жиноят ишлари бўйича Чилонзор туман судининг 2025 йил 20 февралдаги ҳукмига кўра, косметолог Жиноят кодексининг 111-моддаси (эҳтиётсизлик орқасидан баданга ўртача оғир ёки оғир шикаст етказиш) 2-қисми билан айбли деб топилган ва Жиноят кодексининг 57-моддасини қўллаган ҳолда БҲМнинг 10 баравари миқдорида жарима жазоси тайинланган.