Тошкент ер усти метросининг 7-бекати бир кунга ёпилади

Жорий йилнинг 19 апрель куни Тошкент метросининг Ер усти ҳалқа йўли 7-бекатида поездлар ҳаракати бир кунга тўхтатилади. Бу ҳақда “Тошкент метрополитени” ДУК ахборот хизмати хабар берди.

Билдирилишича, Тошкент метрополитени Ер усти ҳалқа йўлининг II босқичидаги Қўйлиқдан Қурувчилар даҳасигача бўлган 5 та метро бекатида поездларнинг синов тариқасидаги ҳаракати ўз якунига етказилмоқда. 

“Шу муносабат билан ушбу янги бекатларни I босқичда барпо этилган бекатлар билан техник жиҳатдан ўзаро боғлаш мақсадида, жорий йилнинг 19 апрель санасида Ер усти ҳалқа йўлининг 7-бекатида (Қўйлиқ) поездлар ҳаракати тўхтатилади”, дейилади хабарда.

Шу куни поездлар ҳаракати “Дўстлик-2”–“6-бекат” оралиғида ташкил этилади. Шунингдек, йўловчилар учун 6-бекатдан 7-бекатга қадар қўшимча автобуслар ҳаракати йўлга қўйилади.

“Келтирилган ноқулайлик юзасидан барча йўловчилардан узр сўраймиз”, дейилади хабарда.