Терактдан кейин Москвада аҳвол қандай? (фото)

Москвадаги “Крокус Сити Ҳолл” концерт залидаги терактдан сўнг дам олиш кунларига режалаштирилган барча оммавий тадбирлар бекор қилинди, пойтахтда айрим савдо марказлари ва муассасалар ёпилди. Бу ҳақда Москва мэри Сергей Собянин маълум қилди.

“Қизил майдон ҳар томондан ташриф буюрувчилар учун ёпиқ эди. Сиз у ерга Манежная майдони ёки Никольская кўчаси орқали боролмайсиз”, дейди вазиятни ёритиш учун борган “MSK1.RU” мухбири.

Унинг сўзларига кўра, Қизил майдон яқинида ўнга яқин полициячи навбатчилик қилмоқда.

Шунингдек, Москва Транспорт департаменти метрода йўловчиларни текшириш кучайтирилгани ҳақида хабар берди. Федерал ҳаво транспорти агентлиги Шереметево, Домодедово, Внуково ва Жуковский аэропортларида хавфсизлик чоралари кучайтирилганини маълум қилди.

Москвадаги турар-жой биноларини бошқариш компаниялари аҳолига ҳушёр бўлиш зарурлиги ҳақида хабар беришни бошлаган. Хусусан, “UK Median” нашри турар-жой мажмуаларидан бирининг Telegram-каналида қўриқлаш хизмати кучайтирилган иш режимига ўтказилгани, аҳоли эҳтиёт бўлишлари, бегона нарсалар ва шубҳали шахсларга яқинлашмаслик кераклиги ҳақида хабар эълон қилди.

Таълим ва фан вазирлиги университетларга дам олиш кунлари оммавий тадбирлар ўтказмасликни ва шанба куни талабаларни масофавий таълимга ўтказишни тавсия қилди.

Москвадаги театрлар ва музейлар фавқулодда ҳолат туфайли 23 ва 24 март кунлари ишламаслигини маълум қилди. Третьяков галереяси, Пушкин музейи ва Тарих музейи ёпилганини эълон қилди.

Москвадан ташқари, Санкт-Петербург, Ленинград вилояти ва Шимоли-ғарбий федерал округнинг бошқа ҳудудларида содир бўлган фожиа фонида хавфсизлик чоралари кучайтирилди. Хусусан, Санкт-Петербургда ушбу воқеадан сўнг савдо марказлари, ресторанлар ва концерт масканларига ташриф буюрувчилар эвакуация қилина бошлади, дам олиш кунларига режалаштирилган барча кўнгилочар тадбирлар бекор қилинди.