Таиландда она қиролича вафот этди

Таиланд қироли Маха Вачиралонгкорннинг (Рама Х) онаси – қиролича Сирикит 93 ёшида вафот этди. Бунинг ортидан қироллик оиласи ва сарой ходимлари учун бир йиллик мотам эълон қилинди. Бу ҳақда қироллик саройига таяниб, “Bangkok Post” хабар берди.

Қироллик саройи баёнотида айтилишича, малика Сирикит кеча, 24 октябрь куни кечқурун Бангкокдаги Таиланд Қизил Хоч жамиятига қарашли Қирол Чулалонгкорн Мемориал шифохонасида ҳаётдан кўз юмган.

У бир нечта касалликлардан азият чекаётган, танасининг турли тизимларида фаолият бузилишлари кузатилган ва доимий тиббий назорат остида бўлган. Жорий йилнинг 17 октябрь куни унда қон инфекцияси ривожланиб, шифокорларнинг барча саъй-ҳаракатларига қарамай, аҳволи ёмонлашиб борган ва кеча, 24 октябрь куни 93 ёшида вафот этган.

Қирол онаси билан хайрлашув маросимини энг олий қироллик маросимларига мувофиқ тарзда ўтказишни буюрган. Шунингдек, у қироллик оиласи ва сарой ходимлари учун бир йиллик мотам эълон қилган.

Маълумот учун, Сирикит 1932 йил 12 августда Бангкокда туғилган. 1946-2016 йилларда ҳукмронлик қилган қирол Пхумипон Адульядет (Рама IХ) билан хорижда таълим олаётган даврида унаштирилган. Улар 1950 йил 28 апрелда Бангкокда турмуш қурган. Қиролнинг тахтга чиқиш маросимида Сирикит тўлақонли малика мақомига кўтарилган.

Она қиролича Сирикит бутун ҳаёти давомида Таиланд халқига фидокорона хизмат қилгани, қишлоқ ҳудудларини ривожлантириш, аёллар ролини мустаҳкамлаш ва анъанавий тай санъатлари ҳамда асраш ишларига бағишлагани учун халқ орасида чуқур ҳурмат қозонган.

Эслатиб ўтамиз, аввалроқ 2021 йилдаги ҳарбий тўнтариш ортидан ҳокимиятга келган Мьянма президенти вазифасини бажарувчи Мьин Шве 74 ёшида вафот этган эди.