“Султон Сулаймон” ва “Аличо” қамоққа ҳукм қилинди

Машҳур туркиялик актёрлар Ҳалит Эргенч (“Муҳташам юз йил” сериалида Султон Сулаймон ролини ижро этган) ва Риза Кожаўғли (“Чуқур” сериалида Аличо ролини ижро этган) “ёлғон гувоҳлик бериш” жиноятида айбли деб топилиб, уларга озодликдан маҳрум этиш жазоси тайинланди. Бу ҳақда “Milliyet” хабар берди.

Истанбул Бош прокуратураси томонидан тайёрланган айблов хулосасида Ҳалит Эргенч ва Риза Кожаўғли “шубҳаланувчи” сифатида кўрсатилган. Улар 2013 йилда бўлиб ўтган Гези Парки воқеалари бўйича айбланаётган актёр ва норозилик намойишлари тарғиботчиси Мемет Али Алабора билан алоқалари бор-йўқлиги ҳақида гувоҳлик берган, аммо бу гувоҳликлар ҳақиқатга зид бўлгани қайд этилган.

Суд ҳужжатларига кўра, Эргенч ва Кожаўғли ўз баёнотларида Алабора билан фақат санъат доирасида таниш бўлганини билдирган, бошқа томонлама алоқалари йўқлигини айтишган. Бироқ 2013 йилдаги Гези воқеалари даврида улар ўртасида боғланишлар бўлгани мобил алоқа ёзувлари орқали аниқланган. Эргенч Алабора билан 12 марта, Кожаўғли билан эса 1 марта алоқада бўлгани аниқланган.

Бундан ташқари, улар Гези Парки норозилик намойишларида Алабора билан бирга иштирок этгани акс этган суратлар ва видеолар ҳам мавжудлиги айтилмоқда.

Прокуратура уларнинг ёлғон гувоҳлик бериб, терговни чалғитганини эътиборга олиб, 2 йилдан 4 йилгача озодликдан маҳрум қилишни сўраган эди.

Суд эса Ҳалит Эргенчни 1 йил 10 ой 15 кун, Риза Кожаўғлини эса 1 йил 8 ой озодликдан маҳрум этган. Суд ушбу қарор орқали гувоҳлик беришда ростгўйликнинг муҳимлиги ва ёлғон гувоҳлик жиддий жиноят эканини таъкидлаган.

Маълумот учун, Гези Парки воқеалари ёки Гези Парки норозилик намойишлари 2013 йил 28 май куни Истанбулдаги Гези Паркида бошланган эди. Бу ҳаракат тез орада сўз эркинлиги, оммавий ахборот воситаларига цензура, авторитаризм каби ижтимоий муаммолар ва Ражаб Тойиб Эрдўғаннинг сиёсатига қарши йирик норозилик ҳаракатига айланди. Ижтимоий тармоқларнинг фаоллиги билан бу намойишлар Туркия Республикаси тарихидаги энг катта оммавий норозилик ҳаракатларидан бирига айланди. Ҳукумат маълумотига кўра, тахминан 3,6 миллион киши Туркия бўйлаб ташкил этилган 5 мингга яқин норозилик намойишларида фаол иштирок этган. Ушбу воқеаларда 22 киши ҳалок бўлган, 8 мингдан ортиқ одам жароҳат олган, кўплари оғир аҳволда бўлган.

Мемет Али Алабора ҳам турк актёри саналади. У 2013 йилдаги Гези Парки намойишлари пайтида фаол иштирок этгани билан кенг танилган. У намойишларни жамоатчилик олдида қўллаб-қувватлаган ва бу позицияси учун ҳукумат танқидига учраган. Айрим турк расмийлари ва ҳукумат тарафдорлари уни намойишларни қўзғатишда ва тарғиб қилишда айблаган.

Гези воқеаларидан кейин у ўзини сиёсий босим остида сезган ва маълум вақтдан кейин Туркиядан чиқиб кетган. У ҳақида тергов ишлари олиб борилган, жумладан, 2025 йилда у алоқада бўлгани айтилган машҳур актёрлар ҳам айбланган ва судга тортилган.