“Султон Сулаймон”дан кейин “Рустам пошо” ҳам қамалди

Туркиялик актёр Ўзан Гувен собиқ севгилиси Дениз Булутсузга нисбатан зўравонлик ишлатгани бўйича суднинг якуний ҳукми эълон қилинди. Истанбул Адлия саройининг 58-жиноий судида бўлиб ўтган охирги мажлисда суд Озан Гувенни “қасддан тан жароҳати етказиш” айби билан 2 йил 3 ой озодликдан маҳрум қилишга ҳукм қилди. Бу ҳақда “Milliyet” хабар берди.

Қайд этилишича, суд Озан Гувенга қўйилган “эркинликдан маҳрум қилиш” ва “ҳақорат қилиш” айбловларини олиб ташлаган. Судда жабрланувчи сифатида иштирок этган Дениз Булутсуз эса унга қўйилган “енгил тан жароҳати етказиш” моддаси бўйича айбсиз деб топилган.

Иш тафсилотларига кўра, 2020 йил 13 июнь куни Озан Гувеннинг уйида жанжал содир бўлган ва Гувен собиқ севгилисини стол чироғи ва қўллари билан уриб, унга тан жароҳати етказган. Бу ҳолатда стол чироғи қурол сифатида баҳоланган. Булутсузнинг жағ соҳасидаги жароҳати асосида тиббий экспертиза тайинланган.

Адли тиббиёт институти томонидан эълон қилинган якуний ҳисоботда Булутсуз олган жароҳатлар ҳаёт учун хавфли бўлмагани, оддий тиббий муолажа билан бартараф этиб бўлмаслиги мумкинлиги, бироқ суяк синиши ёки органлар фаолиятининг йўқолиши каби оғир асоратлар йўқлиги таъкидланган. Шу тариқа, суд жараёни бир неча йил давом этган тергов ва экспертизалардан сўнг якунланган.

Маълумот учун, Ўзан Гувен ўзбек томошабинлари орасида “Муҳташам юз йил” сериалидаги Рустам пошо образи билан машҳур. 

Эслатиб ўтамиз, аввалроқ машҳур туркиялик актёрлар Ҳалит Эргенч (“Муҳташам юз йил” сериалида Султон Сулаймон ролини ижро этган) ва Риза Кожаўғли (“Чуқур” сериалида Аличо ролини ижро этган) “ёлғон гувоҳлик бериш” жиноятида айбли деб топилиб, уларга озодликдан маҳрум этиш жазоси тайинланганди.