Суданда 130 аёл зўрланишдан қочиш учун ўзини ўлдирди

Суданда 130 аёл жинсий тажовуздан қочиш учун ўз жонига қасд қилди, уларнинг кўпчилигида ҳуқуқни муҳофаза қилувчи органлар айбланмоқда. Бу ҳақда ҳуқуқ ҳимоячиси Ҳала Ал-Кариб Нигериянинг “News Central” телеканали эфирида маълум қилди.

Унинг сўзларига кўра, бу фақат маълум ҳолатлар, аёлларнинг ўз жонига қасд қилишлари сони аниқ статистикадан ҳам анча юқори.

БМТ миссияси, шунингдек, Судандаги жинсий зўравонлик ҳақида хабар бериб, унинг кўламини “ҳайратланарли” дея қайд этган.

Гуруҳ бўлиб зўрлаш, жинсий қуллик ва мажбурий никоҳ қурбонлари бўлган аёлларнинг ёши 8 ёшдан 75 ёшгача. Ҳуқуқ ҳимоячилари бундай жиноятларнинг аксариятида Судан Тезкор ҳаракат кучлари аъзоларини айбламоқда. 2023 йилда улар ва Судан Қуролли кучлари ўртасида қуролли тўқнашув бошланган, оқибатда 14 миллион киши қочқинга айланган.

Ҳала Ал-Карибнинг сўзларига кўра, кўпгина шаҳарларда ғолиб томоннинг аскарлари аёллар ва қизларни ўз лагерларига ҳайдаб, уларни ўша жойларда таҳқирлайди ёки ғайриинсоний шароитларда ушлаб туриб, жинсий қулликка мажбурлайди.

2024 йилда мамлакатда қўлга олинган қизларни мажбуран турмушга бериш ҳоллари сони кескин ошган. Ҳуқуқ фаоли бир неча кун олдин қишлоқлардан бири қўлга олингани ва у ердаги эркаклар ўлдирилганидан сўнг 100 дан ортиқ аёл ҳарбийлар қўлига тушиб қолмаслик учун ўз жонига қасд қилганини ҳам эслатган.

Мамлакатдаги мустақил халқаро фактларни аниқлаш миссияси раҳбари Муҳаммад Чандэ Усмонга кўра, ҳозирда Суданда хавфсиз жой йўқ.

Эслатиб ўтамиз, аввалроқ Қозоғистоннинг Қизилўрда шаҳрида 16 ёшли қиз 2024 йилнинг февраль ойидан бошлаб олти ой давомида синфдошлари томонидан жинсий қулликда сақлангани маълум бўлганди. Айбланувчилар қизни “Мефедрон” ичишга мажбурлаб, гиёҳванд моддаларга ўргатган, уни фоҳишалар веб-сайтида рўйхатдан ўтказган, турли эркаклар билан минг мартадан ортиқ жинсий алоқа қилишга мажбурлаган ва яна турли хил қийноқларга солган.