ССВ янги мобиль иловани ишга туширди

Эндиликда Ўзбекистонда дорихоналарда мавжуд бўлган дорилар ва уларнинг нархлари ҳақида фуқаролар мобил иловалар ёрдамида маълумот олишлари мумкин бўлади. Бу ҳақда жорий йилнинг 12 июль куни Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида Соғлиқни сақлаш вазирлиги ва Фармацевтика тармоғини ривожлантириш агентлиги томонидан ташкил этилган фармацевтика саноатидаги ислоҳотларга бағишланган матбуот анжуманида маълум қилинди.

Вазирликнинг Жамоатчилик билан алоқалар бўлими бошлиғи Фурқат Санаевнинг таъкидлашича, “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК Ўзбекистонга кириб келаётган ва ишлаб чиқарилаётган дори воситаларининг сифатини назорат қилади, уларни давлат рўйхатидан ўтказади. Мазкур муассаса томонидан 2018 йил ва 2019 йилнинг 1 майига қадар сифати талабга жавоб бермагани учун 258 номдаги дори воситалари ва тиббий буюмлар, 43 номдаги субстанцияларга мувофиқлик сертификати бериш рад этилган.

Маълум бўлишича, бу борадаги ишлар янада такомиллиштирилиб, дори воситаларини электрон тарзда назорат қилиш тартиби белгиланади. Бунда халқаро тажрибаларни ўрганган ҳолда янги тизим жорий этиляпти. Унга кўра, ҳар бир импорт қилинаётган ва ишлаб чиқарилаётган дори воситасига махсус стикерлар ёки ёрлиқлар жойланиб, дори расталарига етказилади. Келгусида шу стикер ёки ёрлиқлар асосида аҳоли ҳар бир дори ва унинг нарх-навоси ҳақида мобиль илова орқали батафсил маълумот олиши мумкин бўлади.

Шунингдек, матбуот анжуманида дори-дармон сифатини назорат қилиш борасидаги ишлар хусусида ҳам тўхталиб ўтилди. 

“Ховотирга ўрин йўқ. Дори воситаларининг сифати қатъий назоратда бўлиб, сифатсиз дори воситаларининг ишлаб чиқарилишига ва четдан юртимизга кириб келишига асло йўл қўйилмайди. Шу мақсадда фармацевтика тармоғини ривожлантириш Агентлиги қошида Дори воситалари, тиббий буюмлар ва тиббий техника экспертизаси ва стандартлаштириш давлат маркази фаолият юритаяпти”, деди тадбирда Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК ахборот-таҳлил бўлими бошлиғи Муҳаббат Иброҳимова.