Словакиядаги мактабда пичоқбозлик бўлди. Қурбон бор

Бугун, 29 сентябрь куни Словакия шимоли-ғарбидаги Страшков посёлкаси мактаб ўқувчиси синфдош қизга ва икки нафар ўқитувчига пичоқ билан жароҳат етказди. Бу ҳақда “Pravda” хабар берди.

Қайд этилишича, ўқитувчилардан бири оғир аҳволда вертолётда шифохонага етказилган. Қутқарувчилар унинг ҳамкасбига воқеа жойида ёрдам кўрсатишга ҳаракат қилган. “JOJ” телеканали эса ўқитувчилардан бири вафот этгани ҳақида ахборот берган. Мактаб ўқувчиси елкасидан жароҳат олган. Ярадорларнинг аҳволи ҳақида бошқа тафсилотлар келтирилмаган.

Ҳужумни бувиси томонидан тарбияланаётган саккизинчи синф ўқувчиси содир этган. Полиция унинг ҳаракатларини оғир жиноятлар ҳақидаги жиноий моддалар бўйича малакаламоқда.

Фавқулодда ҳодиса жойига полиция, қутқарувчилар ва тиббий хизмат вертолётларини ўз ичига олган тез тиббий ёрдам кучлари етиб борган. Страшковга Словакия Ички ишлар вазири Матуш Шутай-Эшток ва республика Таълим вазири Томаш Друкер жўнаб кетган.

Бу орада Словакия Бош прокурори Марош Жилинка республикада кескинлик кучайишидан огоҳлантирган.

“Одамлар ўртасида кескинликнинг ортишидан огоҳлантираман. Бутун жамиятни зўравонлик, нафрат ва ортиб бораётган агрессия кўринишларига бефарқ бўлмасликка қатъий даъват этаман”, дейди Бош прокурор.

Эслатиб ўтамиз, аввалроқ Туркиянинг Маниса вилояти Тургутлу туманидаги лицей олдида номаълум шахс қурол билан атрофга тасодифий ўқ узганди. Ҳужум оқибатида бир ўқувчи ҳалок бўлган, 8 киши жабрланган эди.