Сиз мамлакатингизни дунёга очдингиз – Марко Рубио Президент Шавкат Мирзиёев ислоҳотларига юксак баҳо берди (видео)

АҚШ Давлат котиби Марко Рубио Ўзбекистон билан муносабатларни ривожлантириш Қўшма Штатлар ташқи сиёсатининг устувор йўналишларидан бири эканини таъкидлади. Бу ҳақда у кеча, 19 октябрь куни Америка-Ўзбекистон ишбилармонлик ва инвестиция кенгашининг иккинчи йиғилишида сўз очди.

“Ҳеч кимда шубҳа бўлмасин: Қўшма Штатлар ушбу минтақанинг ҳам, Ўзбекистоннинг ҳам ҳамкори бўлишни истайди. Биз аллақачон ҳамкормиз ва бу ҳамкорликни янада мустаҳкамлаш ҳамда кенгайтириш ниятидамиз”, дейди Марко Рубио.

Давлат котиби Ўзбекистонга АҚШдан 200 нафардан ортиқ бизнес вакили ташриф буюрганини алоҳида қайд этиб, келгусида бундай ташрифлар янада кўпайишига ишонч билдирган.

“Балки сизларга бу ердан квартира ёки кичикроқ уй сотиб олиш ҳам керак бўлар. Чунки энди Ўзбекистонга тез-тез келишингизга тўғри келади. Биз ҳам сизларнинг бу ерга тез-тез келишингизга умид қиламиз”, дейди у америкалик тадбиркорларга юзланиб.

Марко Рубио бундай кенг кўламли ҳамкорликка айнан Президент Шавкат Мирзиёев амалга оширган ислоҳотлар замин яратганини алоҳида эътироф этган.

“Лекин буларнинг барчаси Сиз амалга оширган ислоҳотларсиз мумкин бўлмас эди, жаноб Президент. Сиз мамлакатингизни дунёга очдингиз. Энг муҳими, Қўшма Штатлар ва Президент Трампни ҳамкор сифатида қабул қилдингиз. Натижада Сиз нафақат ўз мамлакатингиз, балки бутун минтақа, қўшни давлатларингиз ва Қўшма Штатлар учун ҳам биргаликда ривожланиш борасида улкан имкониятлар яратдингиз”, дея таъкидлайди АҚШ Давлат котиби.

У мулоқотларни тарихий аҳамиятга эга воқеа сифатида баҳолаб, беш ёки ўн йилдан кейин АҚШ ва Ўзбекистон муносабатлари ривожи таҳлил қилинганида айнан шу оқшом алоҳида эсланишига ишонч билдирган.