Сиднейда даҳшатли отишма бўлди (видео)

Кеча, 5 октябрь куни Австралиянинг Сидней шаҳрида бир эркак ўз квартирасидан кўчадаги одамларга қарата ўт очди. Воқеа оқибатида 16 киши яраланди. Бу ҳақда “The Guardian” хабар берди.

Маълум қилинишича, эркак тахминан 50 марта ўқ узган. Ҳодиса кечқурун содир бўлган, кўчаларда ўқлар овози эшитилгач, ҳудуд тўсиб қўйилган. Эркак ҳайдовчиларга, биноларга ва ҳатто полиция машиналарига қарата ўт очган.

Аниқ ўқ сони номаълум, лекин “50 дан 100 тагача бўлиши мумкинлиги” айтилмоқда. Қўлга олиш жараёнида эркак полицияга қаршилик кўрсатган, полиция эса “ўқлар ёмғири” остида қолган. 

Отишма оқибатида бир нечта биноларга ва бир кафега зарар етган. Кафе эгаси дастлаб икки марта ўқ овозини эшитган, лекин нима бўлганини тушунмаган. Уларнинг меҳмонлари овқатланишда давом этган. Кейин эса узлуксиз овоз эшитилганини айтган. Ичкарида ўқ-дорининг ҳиди тарқалган. Полиция уларга жойида қолиб, ичкарига яширинишни маслаҳат берган.

Ҳодиса оқибатида олти киши шифохонага ётқизилган, улардан бири оғир аҳволда. Икки эркак ойнадан сачраган шиша бўлаклари туфайли жароҳат олган ва уларга воқеа жойида тиббий ёрдам кўрсатилган. Умуман олганда, воқеа жойида енгил жароҳатланган 16 кишига ёрдам кўрсатилган.

Янги Жанубий Уэльс полицияси гумондорни ҳибсга олган, унинг қуроли мусодара қилинган. Ҳибсга олиш вақтида эркакнинг ўзи ҳам жароҳат олган ва шифохонага ётқизилган. Йўллар ҳануз ёпиқ, транспорт ҳаракати чекланган.

Эслатиб ўтамиз, аввалроқ Қуддусдаги йўл чорраҳасида юз берган отишма оқибатида беш киши ҳалок бўлганди. Исроил полициясига кўра, икки қуролли шахс шаҳар шимолидаги Рамот чорраҳасида автобус бекатига ўт очган. Хавфсизлик ходими ва бир фуқаро қарши ўт очиб, ҳужумчиларни “зарарсизлантирган”.