Швейцария Жазоирни мағлуб этиб, 1/8 босқичга йўл олди

Бугун, 3 июль куни Швейцария терма жамоаси 2026 йилги Жаҳон чемпионатининг 1/16 финалида Жазоирни 2:0 ҳисобида мағлуб этди. Натижада швейцарияликлар мусобақанинг нимчорак финал босқичига чиқди.

Ванкувер шаҳрида бўлиб ўтган учрашувда Швейцариянинг ғалаба голларини Брил Эмболо 10-дақиқада ҳамда Дан Ндойе 46-дақиқада киритди.

Шу тариқа, швейцарияликлар тарихда учинчи марта мундиалнинг чорак финали йўлланмасини қўлга киритиш имкониятини сақлаб қолди. Бунга қадар улар плей-оффда фақат 1934 ва 1938 йилларда ғалаба қозонган эди.

Энди Швейцария 1/8 финалда Колумбия – Гана жуфтлиги ғолиби билан баҳс олиб боради. Учрашув жорий йилнинг 7 июль куни бўлиб ўтади. 

Жазоир эса 1/16 финалда мусобақани тарк этган бешинчи Африка вакилига айланди. Аввалроқ, Жанубий Африка, Сенегал, Кот-д’Ивуар ва Конго Демократик Республикаси ҳам плей-оффнинг илк босқичида мағлуб бўлган эди. Кабо-Верде, Миср ва Гана эса ўз баҳсларини энди ўтказади. Марокаш эса ҳозирча кейинги босқичга чиққан ягона Африка терма жамоаси бўлиб турибди.