“Шрек” катта экранга қайтиши мумкин – Бандерас

“Шрек” анимацион фильмининг бешинчи қисми чиқишига Антонио Бандерас ишора қилди. Бу ҳақда “Peopletalk” нашри хабар берди.

Испаниялик актёр, режиссёр Антонио Бандерас овоз берган “Этик кийган мушук 2: Сўнгги тилак” мультифильми Қизил денгиз халқаро кинофестивалида намойиш этилди. У ерда актёр томошабинларга “Шрек” мультфильмининг катта экранга қайтишини маълум қилган. Шунингдек, у бу сафар этик кийган мушук образини ҳам кўриш мумкинлигини таъкидлаган.

“Мен бу мушук билан деярли 20 йилдан бери биргаман. Эҳтимол, яна у билан бирга бўларман, Шрек эса қайтиши мумкин”, дейди актёр.

Маълумот учун, “DreamWorks Animation” томонидан ишлаб чиқилган “Шрек” мультфильми “Энг яхши анимацион фильм” номинациясида “Оскар”ни қўлга киритган тарихдаги биринчи анимацион фильмдир. Бундан ташқари, у BAFTA, “Annie Award” (8 номинация) ва бошқа кино мукофотлари билан ҳам тақдирланган.

Озода Чориева