Шимолий Кипрда йўловчилар кемаси ағдарилиб кетди. Қурбонлар бор

Шимолий Кипр қирғоқлари яқинида бортида 250 дан ортиқ йўловчиси бўлган кема ағдарилиб кетди. Бу ҳақда TRT Haber хабар берди.

Қайд этилишича, Filo Denizcilik компаниясининг Гирнедан (Кирения) Туркиянинг Ташужу портига сузиб кетаётган кемаси тан олинмаган Шимолий Кипр Турк Республикаси ҳудудидаги Гирне қирғоқларидан тахминан 2 километр узоқликда ағдарилиб кетган.

Бортда 259 нафар йўловчи ва 8 нафар экипаж аъзоси бўлган. Баъзи ОАВлар 267 дан 279 кишигача бўлган рақамларни келтирмоқда. Кеманинг тумшуқ қисми тешилиб, сув тўплана бошлаган, шундан сўнг капитан уни қирғоққа бурмоқчи бўлган, бироқ кема барибир ағдарилиб кетган.

“Ҳалок бўлганлар ва оғир яраланганлар бор”, деб хабар берди Шимолий Кипр транспорт вазири Эрҳан Арикли.

Йўловчилар орасида Германия ва Эрон фуқаролари бўлган.

Воқеа жойига соҳил хавфсизлик катерлари ва қутқарув вертолёти юборилган, қидирув-қутқарув операциясини кучли тўлқинлар қийинлаштирмоқда. Гирне шаҳри ҳокими Мурат Шенкул қутқарувчилар 159 нафар йўловчи билан алоқа ўрнатишга муваффақ бўлганини, ҳозирга қадар юзга яқин киши қирғоққа олиб чиқилганини маълум қилган.

Сўнгги маълумотларга кўра, 8 киши ҳалок бўлган, 23 нафар йўловчи бедарак йўқолган деб ҳисобланмоқда. Тергов ҳаракатлари бошланган, саккиз киши қўлга олинган.

Эрҳан Арикли қидирув-қутқарув ишлари учун барча мавжуд ресурслар сафарбар этилганини — соҳил хавфсизлик катерлари, вертолётлар ва фуқаролик кемалари жалб қилинганини маълум қилган. Шунингдек, денгизга Casa турдаги самолёт ва иккита учувчисиз учиш аппарати юборилган. Фавқулодда хизматларнинг саъй-ҳаракатларига қарамай, кучли тўлқинлар қийинлаштирувчи омил бўлиб қолмоқда.
Гирне портида дала госпитали ташкил этилган.