Шавкат Мирзиёев мунтазам спорт залида машқ қилади – Қозоғистон Президенти

Қозоғистон Президенти Қосим-Жомарт Тўқаев “Туркистон” газетаси берган интервьюсида ўзининг, шунингдек, МДҲ давлатлари етакчиларининг жисмоний фаоллиги ҳақида гапирар экан, Ўзбекистон Президенти Шавкат Мирзиёев яхши фаол жисмоний ҳолатда эканини ва мунтазам спорт залида машқ қилишини таъкидлади. 

Тўқаев дастлаб журналистнинг “яқинда Президент Трамп ўз соғлиғи ҳақидаги маълумотларни эълон қилди. Сиз эса бу борада ёпиқроқсиз. Шу сабабли соғлиғингиз ҳақида турли гап-сўзлар юрибди: айримлар вазн ташлаб, яхшироқ кўрина бошладингиз дейишса, бошқалар бунинг аксини айтмоқда. Шу масалага изоҳ бера оласизми?”, деган саволига жавоб бериб, соғлиғидан шикояти йўқлигини, қон босими барқарор ва меъёрида эканини маълум қилган. 

“Ҳар куни йога билан шуғулланаман, аммо медитация қилмайман. Ҳафтасига бир-икки марта собиқ профессионал спортчи билан стол тенниси ўйнайман. Ҳақиқатдан ҳам тўққиз килограмм вазн ташладим, бу ўзимни анча яхши ҳис қилишимга ёрдам берди”, дейди Қозоғистон етакчиси. 

Тўқаевнинг айтишича, МДҲ етакчиларининг аксарияти соғлом турмуш тарзига амал қилади. Хусусан, у интервьюда Ўзбекистон Президентини жисмонан чиниққан раҳбар сифатида тилга олган. 

“Путин яқинда Бишкекда бўлиб ўтган норасмий тадбирда ёш дзюдочига қарши усул қўллаб, кекса авлод шаънини ҳимоя қилди. Илҳом Алиев ҳам жисмонан бақувват, у мунтазам ва малакали тарзда машғулот қилади. Садир Жапаров футбол ўйнайди. Шавкат Мирзиёев ҳам яхши жисмоний ҳолатда бўлиб, спорт залида машқ қилади. Никол Пашинян – велосипедчи. Александр Лукашенко, маълум бўлишича, ҳанузгача хоккей ўйнайди. Имомали Раҳмон ҳам соғлиғидан шикоят қилмайди, у жангчи-денгизчига хос чанқоққа эга. Демак, барча ҳамкасбларимизнинг жисмоний ҳолати аъло даражада”, дейди Қозоғистон раҳбари.