Шавкат Мирзиёев Бухорога борди

Бугун, 24 август куни Ўзбекистон Республикаси Президенти Шавкат Мирзиёев Ўзбекистон – Озарбайжон саммитининг иккинчи куни тадбирларида иштирок этиш учун Бухоро шаҳрига борди. Бу ҳақда Президент матбуот хизмати хабар берди.

Қайд этилишича, ташриф хайрли амалдан – Баҳоуддин Нақшбанд мақбараси зиёратидан бошланган. Қуръон оятлари тиловат қилиниб, халққа тинчлик-фаровонлик тилаб, дуо ўқилган.

Мажмуа ислом оламининг улуғ қадамжоларидан бири ҳисобланади. Мазкур зиёратгоҳ Нақшбандия тариқатининг асосчиси Баҳоуддин Нақшбанд дафн этилган жойда барпо этилган бўлиб, бугунги кунда мақбара, хонақоҳ, масжидлар, дахма ва сўфийлик тарихи музейини ўз ичига олади.

Қайд этиш жоиз, Ўзбекистон Республикаси Президенти Шавкат Мирзиёевнинг таклифига биноан давлат ташрифи билан мамлакатда бўлиб турган Озарбайжон Республикаси Президенти Илҳом Алиев ҳам бугун, 24 август куни Бухоро шаҳрига жўнаб кетган.

“Тошкент-Ҳумо” халқаро аэропортида Олий мартабали меҳмонни Ўзбекистон Республикаси Олий Мажлиси Қонунчилик палатасининг Спикери Нуриддин Исмоилов, Тошкент шаҳар ҳокими Шавкат Умурзоқов ва бошқа расмийлар кузатиб қўйган.