Сеул КХДРни ҲАМАСга қурол етказиб беришда айблади

Корея Республикаси ҳукумати КХДР томонидан ишлаб чиқарилган қуролларнинг хорижга олиб чиқилишидан жиддий хавотирда, чунки бу БМТ Хавфсизлик Кенгаши резолюциялари билан тақиқланган. Бу ҳақда Корея Республикаси Ташқи ишлар вазирлиги расмий вакили Лим Су Сок маълум қилди.

“Ҳукумат Шимолий Кореяда ишлаб чиқарилган қуролларнинг хорижга узатилишидан жиддий хавотирда. Шимолий Корея билан қурол савдоси БМТ Хавфсизлик Кенгашининг бир қанча резолюцияларини бузади ва халқаро тинчлик ва хавфсизликка, жумладан Корея яриморолига жиддий таҳдид солади”, дейди Лим Су Сок.

У АҚШ оммавий ахборот воситаларининг яқинда ҲАМАС жангчилари Шимолий Кореянинг граната отиш мосламасидан фойдалангани ҳақидаги иддаосига қўшилган.

“Ҳукуматимиз АҚШ, Япония ва дўст давлатлар билан ҳамкорликда БМТнинг барча аъзолари Хавфсизлик Кенгаши резолюцияларига риоя қилишларини таъминлаш учун саъй-ҳаракатларни давом эттиради. Биз фурсат келганда, жумладан, БМТ Хавфсизлик кенгаши йиғилишларида ўз позициямизни фаол баён қиламиз”, дея қўшимча қилган дипломат.

1 ноябрь куни Корея Республикаси Миллий разведка хизмати Шимолий Корея етакчиси Ким Чен Ин Фаластинга ҳар томонлама ёрдам кўрсатиш бўйича таклифлар тайёрлашга буйруқ берган бўлиши мумкинлигини айтган.