Самарқанддаги туғуруқхонадан чақалоқ ўлик ҳолда топилди

Ижтимоий тармоқларда Самарқанд вилоятининг Пайариқ туманида аёл туғруқхона олдида чақалоғини дунёга келтириб, ҳожатхонанинг чиқинди қутисига ташлаб кетгани ҳақида хабарлар тарқалди. QALAMPIR.UZ мазкур ҳолатга аниқлик киритиш мақсадида вилоят Ички ишлар бошқармаси матбуот хизмати билан боғланди. 

Бошқармага кўра, ҳолат ўтган йилнинг 27 декабрь куни  Пайариқ туманидаги туғруқхонада содир бўлган. Чақалоқ топилгач, унинг нафас олмаётгaни ва ўлик ҳолда экани аниқланган, лекин у онаси томонидан ўлдирилганми ёки йўқ, бу ҳали номаълум. 

ИИБга кўра, айни пайтда иш бўйича экспертиза тайинланган. Боланинг тирик туғилгани ёки ҳомила нобуд бўлиб кейин туғилгани ушбу экспертизадан сўнг маълум бўлади. 

“Экспертиза хулосаси эълон қилинганидан сўнг қўшимча маълумот тақдим этилади”, деди бошқарма матбуот хизмати вакили. 

Эслатиб ўтамиз, аввалроқ Фарғона нефтни қайта ишлаш заводи ҳудудида жойлашган 12-сонли ишлаб чиқариш цехининг ер майдонига тахминан 3-6 ойлик бўлган ҳомила кўмиб кетилгани аниқлангани ҳақида хабар берилганди.