Россиянинг Ўзбекистон билан боғлиқ қандай режалари борлиги очиқланди

Россия раҳбариятининг Ўзбекистон билан боғлиқ улкан режалари бор. Булардан бири – ҳаёт сифатини яхшилаш. Бу ҳақда Россиянинг Ўзбекистондаги элчиси Алексей Ерхов ўзининг Янги йил табригида айтиб ўтди.  

“Президентлар Владимир Владимирович Путин ва Шавкат Миромонович Мирзиёев ўртасидаги ишончли, очиқ ва конструктив мулоқот ютуқлар ва истиқболлар учун мустаҳкам пойдевор бўлиб хизмат қилади. Бу Россия-Ўзбекистон муносабатларининг барча соҳалари учун стратегик йўналиш ва юқори суръатни белгилайди”, дейилади табрикда. 

Эрховнинг қайд этишича, 2025 йил Россия ва Ўзбекистон ўртасидаги муносабатларни ривожлантиришда бой ва самарали давр бўлган, мамлакатлар стратегик шериклик ва иттифоқчиликни мустаҳкамлашда сезиларли ютуқларга эришган.

Шунингдек, интенсив делегация алмашинувлари икки томонлама кун тартибини Россия ва Ўзбекистон фуқаролари манфаатларига қаратилган аниқ мазмун билан тўлдириш имконини берган.

“Бизнинг олдинда улкан режаларимиз бор – ҳамкорликни янада чуқурлаштириш, янги қўшма лойиҳаларни ишга тушириш, минтақалараро алоқаларни кенгайтириш, иқтисодий ўсиш, технологик ривожланиш учун қўшимча шароитлар яратиш ва ҳаёт сифатини яхшилаш”, дейди дипломат. 

Ерхов Ўзбекистон халқига тинчлик ва барқарорлик, фаровонлик ва келажакка ишонч, шунингдек, 2026 йилда янги ютуқлар ва муваффақиятлар тилаган. 

Ўзбекистон-Россия муносабатлари

Маълумот учун, тугаётган йилда Россия Ўзбекистоннинг асосий ҳамкор давлати ўлароқ рўйхат бошида келди. Йил бошидан буён Мудофаа вазири Андрей Белоусов, Президенти Администрацияси раҳбарининг ўринбосари Максим Орешкин, Ҳукумати Раисининг ўринбосарилари Денис Мантуров, Марат Хуснуллин, Александр Новак, Давлат Думаси Раиси Вячеслав Володин, Федерация Кенгаши Раиси Валентина Матвиенко, Ташқи ишлар вазири Сергей Лавров, Санкт-Петербург шаҳри губернатори Александр Беглов каби расмийлар Ўзбекистонга келиб, Шавкат Мирзиёев қабулида бўлди. 

Ўзбекистон Республикаси Президенти Шавкат Мирзиёев 2025 йилда Россия Президенти Владимир Путин билан жами 10 та телефон мулоқотини амалга оширди. Давлат раҳбарлари 8-9 май кунлари Иккинчи Жаҳон уруши тугаганининг 80-йиллиги муносабати билан Москвада ўтказилган тадбирлар, 30 август – 3 сентябрь куни Хитойда бўлиб ўтган ШҲТ саммити ва Ғалабанинг 80 йиллигига бағишланган тантанали тадбирла, 9-10 октябрь кунлари Тожикистонда ўтган Мустақил Давлатлар Ҳамдўстлиги Давлат раҳбарлари кенгаши йиғилиши, 27 июнь куни Белерусда Олий Евроосиё иқтисодий кенгаши йиғилиши, 21-22 декабрь куни Санкт-Петербургда ўтган ЕОИИ саммити ва МДҲ норасмий учрашувида доирасида мулоқотлар ўтказган. 

2025 йилнинг январь-ноябрь ойларида Ўзбекистоннинг ташқи савдо айланмасида экспорт ҳажми 30,9 млрд АҚШ долларни ташкил этган бўлиб, 4 млрд долларлик ҳисса билан Россия рўйхатнинг бошида келмоқда. Умуман, Ўзбекистон ташқи савдо айланмасининг 16,2 фоизи Россия билан боғлиқ. Сайёҳлар ташрифи бўйича Қирғизистон, Қозоғистон ва Тожикистондан кейинги ўринда турган Россиядан январь-ноябрь ойларида 923,8 минг нафар турист келган. Ўзбекистонда чет эл капитали иштирокидаги корхоналар сони 17,9 мингтага етган бўлса, шундан 3 209 таси Россия чекига тушган.

Аммо АҚШ ва Европа мамлакатлари Россиянинг Украинага босқини фонида қатор ўзбекистонлик тадбиркорлар ва бизнес субъектларни Россия билан иқтисодий ҳамкорлиги учун санкциялар рўйхатига киритишда давом этмоқда. Масалан декабрь ойида Фарғона кимё заводи, Gelion Business Trade, Chemistry International, Raw Materials Cellulose компаниялари, шунингдек, Тошкентда туғилган Рустам Мўминов Британия қора рўйхатига кирди. Ноябрь ойида Рустам Мўминов номи Европа Иттифоқининг 19-санкциялар пакетида ҳам тилга олинганди.

Ўзбекистон Республикаси Президенти Шавкат Мирзиёев 2025 йилнинг 26 декабрь куни Олий Мажлис палаталарига йўллаган мурожаатномасида мамлакатнинг келгусидаги асосий шериклари номини айтаркан, рўйхат аввалида Россияни тилга олди.