Россиянинг Украинага ҳужумлари оқибатида 10 киши ҳалок бўлди

Россия армиясининг кеча, 29 июнь куни Украинанинг учта йирик шаҳрига уюштирган ҳужумлари оқибатида камида 10 киши ҳалок бўлди, ўнлаб одамлар жароҳат олди. Маҳаллий расмийларга кўра, зарбалар кун давомида ҳам давом этган ва қурбонлар сони ошиб борган. Бу ҳақда маҳаллий расмийларга таяниб, “Reuters” хабар берди.

Днепропетровск вилояти губернатори Александр Ҳанжанинг маълум қилишича, Днепр шаҳрига берилган ракета зарбаси оқибатида 6 киши ҳалок бўлган, яна 29 киши жароҳатланган. Унинг сўзларига кўра, ҳужум натижасида корхона, мактаб, хусусий уйлар ва автомобилларга зарар етган. 

Украина Президенти Владимир Зеленский Россия ракета зарбаси шаҳар инфратузилмасини нишонга олганини билдирган.

“Россия Днепрга инфратузилмани нишонга олган ҳолда ракета зарбасини берди”, деб ёзган Зеленский X ижтимоий тармоғида.

У қутқарув ишлари давом этаётганини таъкидлаб, Европа ўзининг баллистик ракеталарга қарши мудофаа тизимлари ва ракеталарини ривожлантиришни жадаллаштириши зарурлигини қайд этган. Кечки видео мурожаатида эса Украина раҳбари барча ҳужумларга жавоб қайтарилишини айтган.

“Биз буни, аввало, Россия давлат тизими ва унинг урушни чўзиш имкониятларига таъсир қилиши учун амалга оширмоқдамиз”, деган Зеленский.

Шунингдек, Запорожье шаҳрида Россия дрони микроавтобусга зарба бериши оқибатида икки эркак ва бир аёл ҳалок бўлган. Яна саккиз киши, жумладан етти ёшли бола жароҳат олган. Кейинроқ яна бир дрон автобус яқинида портлаши натижасида етти киши, жумладан икки нафар бола жароҳатланган.

“Одамлар урушни янада кўпроқ ҳис қиляпти. Бундан бошқа нима дейиш мумкин? Бу терроризм, бошқа ҳеч нарса эмас”, деган ҳужумда турмуш ўртоғини йўқотган 58 ёшли Светлана Комарова “Reuters” агентлигига.

Қайд этилишича, Украинанинг иккинчи йирик шаҳри Харковда ҳам бошқарилувчи авиабомба 23 ёшли аёлнинг ҳаётига зомин бўлган. Яна 10 киши жароҳат олган. Шаҳар мэри Игор Тереховнинг маълум қилишича, ҳужум оқибатида трамвай ва 15 дан ортиқ автомобилга зарар етган.

Эслатиб ўтамиз, Россиянинг 28 июнь куни амалга оширган ҳужумлари оқибатида Украинанинг жануби-шарқий ва шимоли-шарқий ҳудудларида камида беш киши ҳалок бўлди, яна бир неча киши жароҳат олгани хабар қилинганди.