Россия Украинага йирик ҳужум уюштирди. Қурбонлар бор (видео)

Россия бугун, 24 майга ўтар кечаси Украина ҳудудига яна кенг кўламли ҳужум уюштирди. Асосий зарбалар Киев ва унинг атрофига берилган. Бу ҳақда Украина пойтахти мэри Виталий Кличко хабар берди.

Кличконинг маълум қилишича, ҳужум оқибатида икки киши ҳалок бўлган. Яна 44 киши жароҳатланган бўлиб, уларнинг 28 нафари, жумладан икки нафар бола шифохонага ётқизилган.

Кличконинг айтишича, Киевнинг марказий қисмидаги Шевченко туманида дронлар кўп қаватли турар жой биноларига келиб урилган.

Шунингдек, шаҳар шимолидаги Оболон туманида учувчисиз аппарат 16 қаватли уйнинг 12–13-қаватларига зарба берган. Ғарбий ҳудуддаги Соломенка туманида эса 24 қаватли бинога 20-қават қисмида зарба теккан. Ижтимоий тармоқларда Соломенка туманида чиққан ёнғин акс этган видеолар тарқалди.
Бундан ташқари, Киевнинг турли ҳудудлари ва шаҳар атрофида дрон ҳамда ракеталар парчалари тушиши оқибатида ёнғинлар юзага келгани хабар қилинди.

“Times of Ukraine” ва бир қатор Telegram-мониторинг каналлари ижтимоий тармоқлардаги видеоларга таяниб, Россия “Орешник” номли ўрта масофали баллистик ракета билан Киев жанубидаги Оқ Черков шаҳридаги номаълум объектга зарба берган бўлиши мумкинлигини ёзмоқда.

Ҳозирча Украина ва Россия расмий манбалари ракета қўлланганини тасдиқламаган. Бироқ интернетда тарқалган видеоларда “Орешник” ракета тизимига хос бўлган жанговар блокларнинг ажралиши ва кучли портлашлар акс этгани айтилмоқда.

Агар бу маълумот тасдиқланса, бу Россиянинг Украинага қарши уруш бошланганидан бери “Орешник” ракетасидан учинчи марта фойдаланиши бўлади.

Аввал, Россия 2024 йил ноябрида Днепр шаҳридаги ҳарбий-саноат мажмуасига шу ракета билан зарба берганини маълум қилган эди. Россия Президенти Владимир Путин мамлакатда бундай ракеталар захираси мавжудлиги ва уларнинг серияли ишлаб чиқарилиши йўлга қўйилганини айтган.
2026 йил январь ойида эса Россия “Орешник” билан Украина ғарбидаги Львов вилоятига ҳужум қилган. Россия Мудофаа вазирлигига кўра, зарба ортидан Львов авиация-таъмирлаш заводи ишдан чиққан.

Россия ҳукумати бу ҳужумни 2025 йил охирида украин дронлари Путиннинг Валдайдаги қароргоҳига ҳужум қилишга урингани билан изоҳлаган.

Украина Президенти Владимир Зеленский 23 май куни разведка маълумотларига таяниб, Россия “Орешник”ни яна қўллашга тайёрланаётгани ҳақида огоҳлантирган. У Киев иттифоқчиларини Москвага босимни кучайтириш ва Россиянинг ҳаракатларига “ҳодисадан кейин эмас, балки олдиндан” жавоб қайтаришга чақирган.

Эслатиб ўтамиз, 22 май куни Украинанинг Старобельск педагогика коллежига қилган ҳужуми оқибатида ўн киши ҳалок бўлганди.