Россиядаги жиноятларнинг 2 фоизини мигрантлар содир қилган – Шойгу

Россияда мигрантлар мамлакатдаги умумий жиноятларнинг тахминан 2 фоизини содир этади. Бу ҳақда Россия Хавфсизлик кенгаши котиби Сергей Шойгу ТАСС нашрига берган интервьюсида сўз очди.

“Ўтган йил охиридаги ҳолатга кўра, Россияда 6,3 миллион, 2023 йилда эса 5,9 миллион чет эл фуқароси бўлган. Шу билан бирга, улар томонидан содир этилган жиноятлар сони деярли ўзгармаган ва 38,6 мингтани ташкил этган. Бу мамлакатда рўйхатга олинган жами жиноятларнинг тахминан 2 фоизини ташкил этади”, деган Хавфсизлик кенгаши котиби.

Унинг қўшимча қилишича, Россия Федерациясида қонуний яшаш муддатини ўтаб бўлган шахсларнинг улуши 10 фоиздан ошган. Чет эл фуқароларига нисбатан 3,4 млн маъмурий ҳуқуқбузарлик тўғрисида баённомалар тузилган.

“Содир этилган оғир ва ўта оғир жиноятлар учун жиноий жавобгарликка тортилиши муносабати билан 1,5 мингга яқин киши Россия фуқаролигидан маҳрум этилди”, дея қўшимча қилган Шойгу.

Хавфсизлик кенгаши котиби, шунингдек, мамлакатдаги жиноятчилик билан боғлиқ вазиятга батафсил изоҳ берган.

“Жамоат хавфсизлигини мустаҳкамлаш ва жиноятчиликка қарши курашиш бўйича кўрилаётган чора-тадбирлар жиноий хатти-ҳаракатлар даражасини пасайтиришга ёрдам беради. 2024 йилда 1,9 миллион жиноят қайд этилган. 2023 йилга нисбатан пасайиш 1,8 фоизни ташкил этди. Умуман олганда, бизда жиноятчилик даражасини пасайтириш бўйича кўп йиллик барқарор тенденция шаклланган”, деган у ўз интервьюсида.

Эслатиб ўтамиз, аввалроқ Россияда марказий осиёлик икки киши ўлдирилганди. Улар Нижний Новгород вилоятидаги нефть-кимё корхонасига қарши террорчилик ҳаракатини тайёрлаганликда гумон қилинган. Дастлабки ҳибсга олишга уринишда улар қаршилик кўрсатган ва отишмада отиб ташланган. Уларнинг Марказий Осиёнинг қайси республикасидан экани ҳақида аниқ маълумот берилмаган. Россия Ташқи ишлар вазири Сергей Лавров эса Самарқандга ташрифи давомида ўтказган матбуот анжуманида Россияга бораётган мигрантлар рус тили ва мамлакат қонунларини билиши кераклигини эслатди.