Россияда ўтказилган рейдда озарбайжонликлар ҳалок бўлди

Кеча, 27 июнь куни Россиянинг Екатеринбург шаҳрида Федерал хавфсизлик хизмати томонидан озарбайжонликлар яшайдиган манзилларда ўтказилган рейдлар оқибатида Озарбайжон Республикаси фуқаролари вафот этди. Бу ҳақда Озарбайжон Ташқи ишлар вазирлиги хабар берди.

Қайд этилишича, кеча, 27 июнь куни эрталаб Россия ФХХ томонидан Екатеринбургдаги озарбайжонликларга қарши олиб борилган рейдлар давомида 9 киши ҳибсга олинган. Маълум қилинишича, операция давомида яраланган ва вафот этганлар бор.

“Екатеринбургдаги озарбайжонлар уйларига уюштирилган рейд оқибатида юртдошларимиз ҳалок бўлгани, айримларининг оғир тан жароҳати олгани, 9 киши ҳибсга олингани муносабати билан чуқур ташвиш билдирамиз”, дейилади баёнотда.

Шунингдек, расмий Баку айбдорларни тезроқ топиш ва уларга чора кўришни талаб қилган.

“Биз Россиядан ушбу иш бўйича зудлик билан тергов ўтказишини ва ушбу номақбул зўравонлик учун жавобгарларни имкон қадар тезроқ жавобгарликка тортишини кутамиз”, дейилади Ташқи ишлар вазирлиги баёнотида.

Эслатиб ўтамиз, аввалроқ Нижний Новгороднинг яширин жойдан портловчи қурилмалар ўрнатилган дронларни олиб чиқиб, уларни минтақанинг нефть-кимё саноати корхоналаридан бирига қарши ишлатмоқчи бўлишда гумонлаган икки марказий осиёлик ҳибсга олиш пайтида отиб ўлдирилган эди.

Дилшод Ҳакимов