Россияда теракт уюштирмоқчи бўлган гуруҳ қўлга олинди

Россиянинг Брянск вилоятида мамлакат Федерал хавфсизлик хизмати томонидан теракт уюштирмоқчи бўлганлар қўлга олинди. Бу ҳақда махсус хизматга таяниб, РБК хабар берди.

Қайд этилишича, гумонланувчилар транспорт иншоотларида терактлар уюштиришни режалаштирган украиналиклар бўлган. Операция чоғида уч киши ўлдирилган, яна уч нафари қўлга олинган. 

Хизмат маълумотига кўра, қўлга олинганлар – гуруҳ қўмондони, капитан Александр Жук (2002 йилда туғилган), алоқа ходими, кичик сержант Роман Давдиюк (1980 йилда туғилган) ва фельдшер, катта аскар Александр Годко (1995 йилда туғилган) бўлган. Ўлдирилганлар эса мерган сержант Денис Медведюк (2002 йилда туғилган), муҳандис катта аскар Дмитрий Гавриленко ҳамда муҳандис кичик лейтенант Виталий Явкун (1990 йилда туғилган).

Таъкидланишича, бу гуруҳ Украина Мудофаа вазирлиги Бош разведка бошқармаси назоратидаги махсус операциялар кучлари таркибида бўлган ва транспорт инфратузилмасига қарши диверсия ва терактларни амалга оширишга тайёргарлик кўрган. Улар Ғарб махсус хизматлари ходимлари иштирокида Украинада, шунингдек, Литва, Эстония ва Норвегияда ўқитилган.

Қўлга олинганлардан АҚШ ишлаб чиқарган овозсиз отишга мосланган олтита автомат, Чехияда ишлаб чиқарилган 16 килограмм пластик портловчи модда, кўплаб граната ва НАТО намунасидаги ўқ-дорилар, шунингдек, Украина ҳарбий разведкаси раҳбарияти билан алоқа ўрнатиш учун радиостанция топилган.

Гуруҳнинг асосий вазифаси транспорт объектларида диверсиялар уюштириш бўлган. Ҳибсга олинганлар айбини тан олиб кўрсатма берган.

Маълумотларга кўра, улар ўтган йилнинг сентябрь ойида Украина ҳарбий разведкаси топшириғи билан Новый Оскол туманида темирйўлни портлатган, бу йил май ойида эса Брянск вилоятида автомобиль кўпригини портлатган. 
Уларга нисбатан Россия Жиноят кодекси 281-моддаси 2-қисми “а” банди бўйича (диверсияга тайёргарлик) жиноят иши қўзғатилган.

Эслатиб ўтамиз, аввалроқ Россия таркибидаги Удмуртия Республикасида поездни ёқиб юборишга тайёргарлик кўрган марказий осиёлик шахс қўлга олинганди. Ҳужумга тайёргарлик кўраётган одамни хавфсизлик ходимлари кўча супурувчиси кийимида ушлаган. Улар фуқаронинг ниятидан бохабар бўлган ва ҳужумга тайёргарлик кўриб, супурувчи кийимини кийиб олишган.