Россияда кўприк поезд устига қулади. Қурбонлар бор

Россиянинг Брянск вилоятида автомобиль кўприги темирйўл устига қулаши оқибатида Москва томон ҳаракатланаётган йўловчи поезди рельсдан чиқиб кетди. Бу ҳақда “Газета.ru” хабар берди.

Маълум қилинишича, кеча, 31 май куни маҳаллий вақт билан 22:44 да Брянск вилоятида жойлашган “Пилсино-Вигоничи” йўналишидаги бир йўлакли темирйўл бўлагида автомобиль кўпригининг устки қисми қулаб тушган. Оқибатда ”Климово–Москва” йўналишида ҳаракатланаётган 86-сонли йўловчи поездининг локомотиви ва вагонлари рельсдан чиқиб кетган.

Россия Тергов қўмитаси берган маълумотга кўра, кўприк конструкцияси қулаб тушиб, унинг бўлаклари остидан ўтаётган йўловчи поезд устига тушган.

Ҳодиса юзасидан Россия Тергов қўмитаси ва Москва ўлкавий транспорт прокуратураси томонидан суриштирув ишлари бошланган.

Брянск вилояти губернатори Александр Богомаз ҳалок бўлганлар ва жароҳатланганлар ҳақидаги маълумотларни тасдиқлаган.

“Тезкор маълумотларга кўра, темирйўл устига автомобиль кўприги қулаб тушиши оқибатида, афсуски, етти киши ҳалок бўлган”, дея баёнот билдирган Богомаз.

Қайд этилишича, воқеадан сўнг тунги вақтда 30 киши жароҳатлангани ҳақида хабар берилган, улардан иккитаси ёш бола бўлган.

Жароҳатланганлардан икки киши, жумладан, бир бола оғир аҳволда экани билдирилган.

Тонгга келиб, жароҳатланганлар сони ошган.

“Бугунги кунгача жароҳат олганлар сони 66 кишига етди, улардан учтаси болалар. Уч нафар жабрланувчининг аҳволи оғир. 44 киши шифохонага ётқизилган, яна 22 киши амбулатор кузатувда”, дея маълум қилган губернатор.

РБК нашри Москва темирйўл бошқармасига таяниб, поезд локомотиви ва вагонларининг рельсдан чиқишига транспорт фаолиятига ноқонуний аралашув сабаб бўлганини ёзган.

Айрим ОАВлар эса кўприк қулашига сабаб сифатида устунлардан бирининг портлатилишини келтирган. Ушбу кўприк портлатилганми ёки йўқ бу ҳақда ҳозирча расмий маълумот берилмаган.

Эслатиб ўтамиз, аввалроқ Ҳиндистоннинг Нью-Деҳли темирйўл вокзалида тиқилинч юз бериб, оқибатда 18 киши ҳалок бўлганди.