Россия Ўзбекистонда 2 та АЭС қуришни тезлаштирмоқчи

Ўзбекистон ҳудудида бир вақтнинг ўзида иккита Россия Атом электр станциясини (бири катта ва бири кичик) қуриш масаласи кўриб чиқилмоқда. Бу ҳақда Россия Ташқи ишлар вазири ўринбосари Сергей Рябков Ўзбекистоннинг Россиядаги элчихонасида Ўзбекистон мустақиллигининг 34 йиллиги муносабати билан ташкил этилган қабулда айтиб ўтди.

Унинг сўзларига кўра, бу Марказий Осиёда бундай турдаги биринчи лойиҳадир.

“Ўзбекистонда Россия лойиҳаси бўйича иккита, бири катта ва бири кичик атом электр станциясини қуриш масаласи устида иш олиб борилмоқда. Бу Марказий Осиё минтақасида бундай турдаги биринчи лойиҳа”, деди у.

Рябков АЭСнинг муваффақиятли амалга оширилиши Ўзбекистонга янги технологик ютуқ яратиш имконини беришига ишончи комил эканини таъкидлаган.

Маълумот учун, жорий йилнинг апрель охирида “Росатом” раҳбари Алексей Лихачёв журналистларга берган интервьюсида Ўзбекистонда кичик АЭС қурилиши доирасида яқин бир йил ичида бетон қуйилишини кутаётганларини айтганди. У, шунингдек, Ўзбекистонда катта АЭС қурилиши бўйича ҳам компания тайёр таклифлар ишлаб чиққанини билдирганди. Бу таклифлар орасида молия модели, ташкилий масалалар ва максимал маҳаллийлаштиришга доир вариантлар мавжуд.

Ўзбекистонда қурилиши режалаштирилган кичик АЭС – бу “Росатом”нинг хориждаги илк экспорт лойиҳаси ҳисобланади. Лойиҳа бўйича икки давлат ўтган йилнинг баҳорида келишувга эришган, кузда эса техник ҳужжатларни ишлаб чиқиш ва лойиҳа ишларини бошлаш тўғрисида протокол имзоланган эди.

Аввалги режаларга кўра, ҳар бирининг қуввати 55 МВт бўлган олти реактор қурилиши керак эди. Қурилиш ишлари жорий йил ёзида бошланиши, АЭСнинг босқичма-босқич ишга туширилиши эса 2029-2033 йиллар оралиғида амалга оширилиши режалаштирилган.

“Росатом” раҳбарининг аввалроқ берган баёнотларида билдиришича, лойиҳани молиялаштиришни Ўзбекистон томони зиммасига олади, Россия кредити эса ҳозирча кўриб чиқилмаяпти.