Россия Украинанинг НАТОга қўшилишига вето қўя олмайди – Кўнгиллилар коалицияси

north_east

Украинанинг ҳудудий музокараларга тайёрлиги айтилди

Украина қуролли кучларига ҳам, унинг учинчи давлатлар билан ҳамкорлигига ҳам ҳеч қандай чеклов қўйилмаслиги керак. Россия Украинага Европа Иттифоқи ва НАТОга аъзо бўлиш йўлида вето қўйиш ҳуқуқига эга бўлмаслиги шарт. Бу Германия канцлери Фридрих Мерц, Франция Президенти Эммануэль Макрон ва Британия Бош вазири Кир Стармер раҳбарлигидаги, Украинага кейинги ёрдамни кўрсатиш ниятидаги “кўнгиллилар коалицияси” ҳамраисларининг қўшма баёнотидаги бандлардан бири. Ҳужжат кеча, 13 август куни Буюк Британия ҳукумати сайтида эълон қилинди.

Ушбу куннинг ўзида Мерц, Макрон ва Стармер, Россия ва АҚШ Президентлари Владимир Путин ва Дональд Трамп учрашуви арафасида, Украина Президенти Владимир Зеленский ва АҚШ вице-президенти Жей Ди Вэнс иштирокида “кўнгиллилар коалицияси”нинг виртуал йиғилишини ҳамраис сифатида ўтказди.

“Йиғилиш қатнашчилари Дональд Трампнинг Украинадаги қотилликларни тўхтатиш, Россиянинг агрессив урушига чек қўйиш ва адолатли ҳамда ҳаққоний тинчликка эришишга қаратилган саъй-ҳаракатларини олқишлади”, дейилади Мерц, Макрон ва Стармер баёнотида. 

Шунингдек, улар “Президент Трамп билан бўлиб ўтган очиқ муҳокамаларни ҳам мамнуният билан қарши олганини” таъкидлади.

Бу ерда назарда тутилгани тадбир – 13 август куни ўтказилган ёпиқ видеоконференция бўлиб, унда Дональд Трамп, қатор Европа давлатлари раҳбарлари ва Владимир Зеленский иштирок этган. Мақсад — 15 август куни Аляскада бўлиб ўтадиган Трамп ва Путин учрашуви олдидан позицияларни мувофиқлаштириш.

Ҳужжатда таъкидланишича, виртуал йиғилиш қатнашчилари Украинада тинчлик йўлидаги қарорлар Украинанинг ўзи иштирокисиз қабул қилиниши мумкин эмаслигига шубҳа қилмаган. “Кўнгиллилар коалицияси” аъзолари фикрича, бу йўлда фаол дипломатия, Украинага қўллаб-қувватлаш ва Россияга босим ўтказишни биргаликда давом эттириш зарур. 

“Дипломатик ечим Европа ва Украинанинг асосий хавфсизлик манфаатларини ҳимоя қилиши шарт”, дейилади ҳужжатда.

Йиғилишнинг бошқа муҳим хулосалари қаторида “аҳамиятли музокаралар фақат оташкесим ёки ҳарбий ҳаракатлар кўламини сезиларли қисқартириш шароитида ўтказилиши мумкин” деган тезис ҳам бор.

“Иккинчидан, агар Россия Аляскада оташкесимга рози бўлмаса, Россиянинг ҳарбий иқтисодиётига босим ўтказишга қаратилган санкциялар ва кенг қамровли иқтисодий чоралар кучайтирилиши лозим.
Учинчидан, халқаро чегараларни куч билан ўзгартириш мумкин эмас. 
Тўртинчидан, Украинанинг суверенитети ва ҳудудий яхлитлигини самарали ҳимоя қилиш учун у ишончли ва мустаҳкам хавфсизлик кафолатларига эга бўлиши керак”, дейилади баёнотда.

Эслатиб ўтамиз, кеча, 13 август куни Владимир Зеленский Берлинда Мерц билан қўшма матбуот анжуманида зудлик билан ўт очишни тўхтатиш Аляскадаги саммитнинг “марказий мавзуси”га айланишига умид билдирганди. Шу билан бирга, у Путин “аниқ тинчликни истамаслигини” таъкидлаб, Ғарб иттифоқдошларини натижа бўлмаганда Россияга қарши санкцияларни кучайтиришга чақирди.