Россия Киевга баллистик ракета билан зарба берди

Россия бугун, 12 февраль куни эрталаб Украина пойтахти Киевга баллистик ракета билан зарба бериши оқибатида 1 киши ҳалок бўлди. Бу ҳақда Украина Қуролли кучлари хабар берди. 

“Пойтахтда шовқин-сурон. Ҳаво ҳужумидан мудофаа кучлари иш олиб бормоқда. Бошпаналарда бўлинг”, деб ёзди Киев мэри Виталий Кличко ўзининг Telegram-каналида.

Кейинчалик у вазиятга аниқлик киритиб, Оболонский туманида уриб туширилган ракета парчаларининг қулашидан бир киши ҳалок бўлганини, яна уч киши, жумладан 9 ёшли қиз жароҳат олганини, улардан икки нафари шифохонага ётқизилганини маълум қилди.

Украина Фавқулодда вазиятлар бўйича давлат хизмати (ГСЧС) маълумотларига кўра, Оболонский туманида ракета ҳужумидан икки маъмурий бино зарар кўрган, улардан бирида ёнғин келиб чиққан. Святошинский туманида эса кўп қаватли уй томи ёнган, бироқ қутқарувчилар уни тезда ўчиришга муваффақ бўлган. Шунингдек, Голосеевский туманида омборхона жойлашган икки қаватли бинода ёнғин содир бўлган. Бундан ташқари, Дарницкий туманидаги хусусий корхоналардан бирида ёнғин қайд этилган.

ГСЧС маълумотларига кўра, ракета бўлаклари қулаган жойларга 80 дан ортиқ қутқарувчи ва 17 та ёнғин-қутқарув техникаси сафарбар этилган.

“Путин шундай йўл билан Украинадаги урушни тугатмоқчи”, дея изоҳ берган Украина Президенти Владимр Зеленский офиси раҳбари Андрей Ермак.

Маълумот учун, 2024 йил 20 декабрь куни ҳам Россия Киевга ракета ҳужумини амалга оширган. Ўшанда баллистик ракета бўлаклари қулашидан бир киши ҳалок бўлган, яна тўққиз киши жароҳат олган. Шунингдек, Голосеевский туманида иссиқлик магистрали шикастланган, оқибатда 630 та турар-жой биноси, 16 та тиббиёт муассасаси, 17 та мактаб ва 13 та болалар боғчаси иссиқликсиз қолган.

Эслатиб ўтамиз, аввалроқ Россия қўшинларининг Кривой Рогга берган ракета зарбаси оқибатида кўп қаватли тураржой биноси шикастланганди. Бундан ташқари, 15 киши жароҳатланган. Улардан 3 нафарининг аҳволи ўртача оғирликда шифохонага ётқизилган. Бир киши ҳалок бўлган.