Россия Херсон йўналишида сукут режимини эълон қилди

Россия Қуролли кучлари Херсон йўналишидаги Олешки аҳоли пункти яқинида гуманитар операция ўтказилиши муносабати билан жорий йил 27 октябрь Москва вақти билан соат 04:00 дан эътиборан сукут режимини жорий этмоқда. Бу ҳақда Россия Қуролли кучлари Бош штаби бошлиғи – Мудофаа вазирининг биринчи ўринбосари армия генерали Валерий Герасимов маълум қилди.

“Херсон вилоятининг Олешки аҳоли пункти ҳудудида гуманитар операция ўтказилиши муносабати билан Россия Федерацияси Қуролли кучлари томонидан Херсон йўналишида ўт очиш тўхтатилади ва 2026 йил 27 октябрь Москва вақти билан соат 04:00 дан сукунат режими жорий этилади”, дейилади баёнотда.

Унинг қўшимча қилишича, одамлар хавфсизлигини таъминлаш ва ижтимоий муҳим юкларни етказиб бериш учун муҳандислик қидирув-кузатув ишлари ҳамда гуманитар автокарвоннинг хавфсиз ҳаракатланиши ташкил этилади.

Олешки Днепрнинг чап соҳилида – Украина Қуролли кучлари назорати остидаги Херсон қаршисида жойлашган. Бугун, 23 октябрь куни Оқ уй матбуот хизмати Россия ва Украина 29 октябрдан эътиборан тинч аҳолини шаҳардан эвакуация қилиш учун ўт очишни тўхтатишга рози бўлганини хабар қилганди. Бу келишувга АҚШнинг биринчи хоними Мелания Трамп иштирокида эришилган.

“Бу ҳақда Россия президенти Владимир Путин ва АҚШ етакчиси Дональд Трамп ўртасидаги музокаралар чоғида сўз борган”, деб тасдиқлайди Россия етакчисининг матбуот котиби Дмитрий Песков. 

Унинг сўзларига кўра, гуманитар операция доирасида барча кўнгиллилар Олешкини тарк этиши мумкин бўлади. Миссия катта ва мураккаб тайёргарликни талаб қилади.

Песков жорий йилнинг 21 сентябрь куни Олешкида озиқ-овқат билан боғлиқ вазият критик (ўта оғир) эканини, шунингдек, шаҳарга дори-дармон етказиб бериш ҳам қийинлашаётганини айтган. 

Эслатиб ўтамиз, жорий йилнинг 16 октябрь куни Путин Рим папаси Лев XIV билан телефон орқали мулоқот қилганди. Ўшанда томонлар Олешкидаги гуманитар инқирозни ҳам муҳокама қилган. Мулоқот давомида понтифик шаҳардаги тинч аҳолининг тақдиридан хавотир билдирган, Президент эса юзага келган вазият учун Украина жавобгар экани ҳақида “батафсил тушунтиришлар берган”.