Россия флоти қудратини намойиш этувчи денгиз паради қандай ўтди? (видео)

Бугун, 30 июль куни Россияда Ҳарбий-денгиз кучлари куни муносабати билан Санкт-Петербург ва Кронштадтда Асосий денгиз паради бўлиб ўтди. Унда мамлакат Президенти Владимир Путин ҳам қатнашди. 

Давлат раҳбари картерда Финляндия кўрфази, Нева ва Кронштадт йўллари сувларидаги ҳарбий кемаларнинг парад қаторларини айланиб ўтди, уларнинг экипажлари шахсий таркибини Ҳарбий-денгиз флоти куни билан табриклади.
Парад очилишида сўз олган Путин Россия ўз денгиз флотининг қудратини изчил ошираётгани, шу йилнинг ўзида у ҳар хил тоифадаги ўнлаб кемалар билан тўлдирилишини айтди. 

“Бугунги кунда Россия ўз флоти қудратини изчил ошириб, миллий денгиз сиёсатининг кенг кўламли вазифаларини ишонч билан амалга оширмоқда. Биргина жорий йилнинг ўзида флот турли тоифадаги 30 та кема билан тўлдирилмоқда”, деди Путин.

Унинг таъкидлашича, жанговар хизматни бошлаганлар орасида афсонавий бригада жамоасининг жасорати хотирасига аталган Меркурий ракета корвети ҳам бор. 

“Россия флоти кемаларига унинг номини бериш анъанаси қайта тиклангани қувонарли. Янги Меркурийда ҳам денгиз анъаналаримиз дахлсизлиги белгиси, ҳарбий денгизчиларнинг жасорати, мардлиги ва енгилмаслиги рамзи сифатида Авлиё Георгий денгиз байроғи кўтарилди. Бу фазилатлар бугунги кунда тўлиқ намоён бўлмоқда. Россия номидан денгизчиларимиз бор кучларини бериб, чинакам қаҳрамонлик кўрсатмоқдалар, буюк аждодларимиз каби мардонавор курашмоқда”, деди Россия Президенти.

Парадда Путиндан ташқари яна 4 та Президент қатнашди. Улар Россия-Африка саммитидан кейин Санкт-Петербургда қолган эди. Бундан ташқари, Россия-Африка форумида иштирок этган яна бешта давлатнинг “қуйи даражадаги” вакиллари парадда қатнашди.

Маълумот учун, бу йил парадда 45 та кема, катер ва сув ости кемалари, шунингдек, 3000 га яқин ҳарбий хизматчилар иштирок этди. Тадбир ҳарбий хизматчиларнинг парад экипажлари, денгиз флотининг олий ўқув юртлари талабалари ва Юнармия кичик офицерларининг тантанали марши билан якунланди.