Россия Ҳарбий-ҳаво кучларига янги қўмондон тайинланди

Россия ҳарбий-ҳаво кучларининг янги қўмондони этиб аввалроқ Россия узоқ масофали авиациясига қўмондонлик қилган генерал-лейтенант Сергей Кобилаш тайинланди. Бу ҳақда кеча, 24 июль куни Россия Мудофаа вазирлиги хабар берди.

Кобилаш 1965 йилда Одессада туғилган. Ейск олий ҳарбий авиация учувчилар мактабини, Гагарин номидаги Ҳарбий-ҳаво кучлари академиясини ва Россия Қуролли кучлари Бош штабининг Ҳарбий академиясини тамомлаган. 2023 йил январь ойида Украина Хавфсизлик хизмати у Украинадаги тинч аҳоли нишонларини ўққа тутганликда гумон қилинаётганини эълон қилиб, тегишли далиллар тўплаганини маълум қилди.

Маълумот учун, Россия Федерациясининг узоқ масофали авиацияси Ту-95МС, Ту-160 стратегик ракета ташувчилари ва узоқ масофали Ту-22М3 бомбардимончи самолётларини ўз ичига олади. Уларнинг барчаси бир неча бор Украина ҳудудига зарба бериш учун ишлатилган.

Чарос Ўралова