Роналдудан сўнг, энди Месси океан ортида ярим финалда ўйнайди (видео)

АҚШнинг “Интер Майами” клуби Қўшма Штатлар ва Мексика жамоалари ўртасида ўтказиладиган Лига Кубоки мусобақасининг ярим финал босқичига йўл олди. Лионел Месси тўп сурадиган Майамининг “Интер” жамоаси кеча, 21 август куни Флорида штатида жойлашган “Чейс Стэдиум” аренасида чорак финал баҳсида Мексиканинг “Тигрес” клубига қарши баҳс олиб борди. 

Месси иштирок этмаган ўйинда “Интер Майами” 2:1 ҳисобида ғалаба қозонди. 2 та пенальтини голга айлантирган Луис Суарес жамоасига ярим финал йўлланмасини тақдим этди. “Тигрес”нинг ягона голига Анхель Корреа муаллифлик қилди. 

Аргентиналик футбол юлдузи ўйинни майдон ташқарисидан тўлиқ кузатиб борди ва ғалабадан сўнг ўз хурсандчилигини яшириб ўтирмади. 

Энди “Интер Майами” 28 август куни ярим финал учрашувида Флориданинг бошқа бир клуби – “Орландо Сити”га қарши баҳс олиб боради.

Маълумот учун, Мессининг азалий рақиби бўлган португалиялик футбол юлдузи Криштиану Роналду ҳам бундан бир неча кун олдин “Аль-Наср” таркибида Саудия Арабистони Кубоки доирасида ярим финалда майдонга тушиб, “Аль-Иттихад”ни 2:1 ҳисобида мағлуб этган эди.

Нодир Шукуров