Роналду тўйидан сўнг 40 млн долларлик қасрини сотмоқчи – ОАВ

“Ал-Наср” ҳужумчиси Криштиану Роналду Жоржина Родригес билан никоҳ тўйидан кейин Португалиянинг Кашкайш шаҳрида жойлашган ҳашаматли уйини сотишни режалаштирмоқда. Бу ҳақда “Daily Mail” нашри хабар берди.

Манбага кўра, қиймати тахминан 40 миллион долларга баҳоланаётган саккиз ётоқхонали қаср сузиш ҳавзаси, ерости автотураргоҳи ва хусусий кинотеатр билан жиҳозланган. Уй аллақачон қуриб битказилган бўлса-да, Роналду уни тўй маросимидан кейин сотишни кўзламоқда.

Португалиялик футболчи 2025 йилнинг август ойида аргентиналик моделга турмуш қуриш таклифини билдирган. Жуфтлик 2026 йилги Жаҳон чемпионатидан сўнг расмий никоҳдан ўтишни режалаштирмоқда.

Хабарга кўра, беш карра “Олтин тўп” соҳиби мазкур ҳудудда шахсий ҳаётнинг етарли даражада таъминланмаганидан норози. У хавфсизликни кучайтириш мақсадида қўшни меҳмонхона мулки ва гольф майдонини сотиб олишга уриниб кўрган, бироқ таклифи рад этилган.

Шунингдек, Кашкайшдаги ушбу қаср Роналду ва Жоржинанинг тўй маросими ўтказиладиган жойга айланиши мумкин. Шундан сўнг вилла сотувга қўйилади.