Роналду кино соҳасига қадам ташлади

Дунёнинг энг машҳур спортчиси ва Голливуд кинематографияси ўртасидаги янги иттифоқ тузилди – футбол афсонаси Криштиану Роналду ва британиялик машҳур режиссёр Мэттью Вон биргаликда мустақил кино студияси UR•Marv’ни ишга туширганини эълон қилди. Криштиану Роналду бу ҳақда ўзининг X саҳифасида маълум қилди.

Билдирилишича, мазкур қўшма лойиҳа анъанавий кино ишлаб чиқариш моделини янгилашни мақсад қилган. Унда инновацион технологиялар ва замонавий ёндашувлар классик услуб билан уйғунлаштирилади. UR•Marv доирасида ҳозиргача иккита экшн жанрида фильм суратга олинган, учинчиси эса ишлаб чиқилмоқда. Уларнинг барчаси бир сюжет линиясига бирлашган. Биринчи фильм тафсилотлари тез орада эълон қилиниши кутилмоқда.

“Мен учун бу янги ва ҳаяжонли босқич. Футболдан ташқари бизнесда ҳам катта мақсадларим бор”, дея муносабат билдирган Роналду.

Мэттью Вон ҳам мазкур лойиҳа ҳақида баёнот берган.

“Криштиану майдонда шунақанги ҳикояларни яратган-ки, мен бундай сценарийни ёзишга журъат қилолмаган бўлардим. У ҳақиқий суперқаҳрамон. У билан бирга илҳомлантирувчи фильмлар яратишдан мамнунман”, деган у. 

Маълумот учун, Вон – услубий жиҳатдан ўзига хос, динамик ҳаракатларга бой фильмлари билан танилган режиссёр. У “Layer Cake” (“Қатлам торт)” (2004), “Kick-Ass” (Кик-Асс) (2010), “X-Men: First Class” (“Ғаройиб одамлар 1) (2011) ва албатта “Kingsman” (“Кингсмен: Махвий хизмат”) (2014) каби лойиҳалари орқали ўз услубини шакллантирган. Унинг “Marv” компанияси ҳозирда “Kingsman” франшизасининг яна иккита филми устида ишламоқда. 2024 йилда у “Argylle” (“Аргайл”) номли жосуслик триллерини суратга олган, унда Генри Кевилл ва Брайс Даллас Ховард бош ролларни ижро этган.

Роналду эса спорт майдонидан ташқарида ҳам ўз брендини кенгайтириб бормоқда. 2023 йил октябрида у Португалиянинг йирик медиа холдинги – Medialivre’га (илгари Cofina Media) асосий инвестор сифатида қўшилган. Компания “Correio da Manhã” ва “Record” каби машҳур нашрларга эгалик қилади. 2024 йил августида Роналду “UR Cristiano” номли YouTube каналини очди. Унда у шахсий ҳаёти, кундалик фаолияти ва турли лавҳалар улашади. Бу қадамлар унинг кўнгилочар саноатдаги узоқ муддатли стратегиясининг бир қисми деб қаралмоқда.